एमयूलाई भर्ती केन्द्र बनाउने समस्या अन्त्य भयोः उपकुलपति सिंह
सुर्खेत, २१ पुस ।
मध्यपश्चिमाञ्चल विश्वविद्यालयका उपकुलपति नन्दबहादुर सिंहले एमयूलाई भर्ती केन्द्र बनाउने समस्या अन्त्य भएको बताएका छन् । स्थायी जागिर विश्वविद्यालयमा तर विभिन्न कलेजमा पढाउने शिक्षकलाई एमयूले कडाई गरेको हो । उपकुलपति सिंहले स्थायी र करार प्राध्यापकले दैनिक ७ घण्टा अनिवार्य रूपमा विश्वविद्यालयमा बिताउनुपर्ने प्रावधानलाई कडाइका साथ लागू गरिएको बताए । मंगलबार आयोजित भर्चुअल पत्रकार सम्मेलनमा उनले मनलाग्दी तबरले कक्षा दिएर एमयूलाई भर्ती केन्द्र बनाउने समस्या अन्त्य गरिएको बताएका हुन् ।उनले एमयूमा जागिर खाएर अन्य कजलेमा चहार्दै हिँड्ने दिन गएको बताए । आवश्यक परे कलेजको अनुगमन समेत गर्ने उनको भनाई छ ।
स्थायी र करार प्राध्यापकले अन्यत्र बढी समय दिँदा विश्वविद्यालयले अनावश्यक रूपमा ‘पार्ट टाइम’ र कोर्स करारमा शिक्षक राख्ने गरिएको थियो । गत फागुनमा उपकुलपति नियुक्त भएपछि सिंहले कोर्स करारमा रहेका सबै शिक्षकलाई सेवामुक्त गरेका छन् । विश्वविद्यालयको ऐन र नियमावलीमा स्कुल अफ म्यानेजमेन्ट (मुसोम) बाहेक अन्यत्र कोर्स करारमा राख्न पाइने व्यवस्था नभएको उनले बताए ।
भएका जनशक्तिलाई पूर्ण रूपमा काम दिन र अनावश्यक जनशक्ति नथोपर्न विश्वविद्यालय कार्यकारी परिषद्ले पदाधिकारीले अनिवार्य पढाउनुपर्ने निर्णय पनि गरेको छ । उपकुलपति सिंहले ओभरटाइम (ओटी) खाने प्रवृत्तिको अन्त्य गर्न र पदाधिकारीको जिम्मेवारीमा रहेका प्राध्यापकलाई प्राध्यापन पेसासँग जोडिराख्न यस्तो निर्णय गरिएको बताए ।
उनका अनुसार उपकुलपति र रजिस्ट्रारले महिनामा २ कक्षा, डिन, कार्यकारी निर्देशक वा सो सरहका पदाधिकारीले महिनामा ४ कक्षा, सहायक डिनले महिनामा ६ कक्षा, क्याम्पस प्रमुखले महिनामा ८ कक्षा र सहायक क्याम्पस प्रमुखले नियमितसरह कक्षा लिनुपर्ने निर्णय गरिएको छ ।
