वेस्ट इन्डिजविरुद्धको एकदिवसीय शृंखलामा अस्ट्रेलियाको विजयी सुरुवात
एजेन्सी । वेस्ट इन्डिजविरुद्धको तीन एकदिवसीय शृंखलामा अस्ट्रेलियाले विजयी सुरुवात गरेको छ। आज विहान सम्पन्न खेलमा पाहुना टोलीले डकवर्थ लेविस नियमअन्तर्गत १ सय ३३ रनको ठूलो अन्तरको जित निकालेको हो।
यससँगै उसले एकदिवसीय सिरिजमा १–० को अग्रता लिएको छ। पहिले ब्याटिङ गरेको अस्ट्रेलियाले कप्तान एलेक्स क्यारीको ६७ रनको मद्दतले ४९ ओभरमा नौ विकेट गुमाएर २ सय ५२ रन बनाएको थियो।
वर्षाले प्रभावित खेलमा घरेलु टिमले २६ दशमलव २ ओभरमा सबै विकेट गुमाएर १ सय २३ रन मात्र बनाउन सक्यो। अस्ट्रेलियाका लागि मिचेल स्टार्कले घातक बलिङ गर्दै ४८ रन दिएर पाँच विकेट लिए।
