हस्त चाैलागाईं
कालिकाेट ,५ जेठ ।

कर्णाली राजमार्गलाई अहिले पनि धेरैले “मृत्यु मार्ग” का रूपमा चिन्ने गर्छन् । साँघुरा सडक, जोखिमपूर्ण मोड, तीव्र गति, लापरवाहीपूर्ण सवारी सञ्चालन र चालकको असावधानीका कारण वर्षेनी यहाँ दर्जनौं नागरिकले ज्यान गुमाउँदै आएका छन् । यही पीडादायी अवस्थालाई अन्त्य गर्दै सुरक्षित यात्राको संस्कार बसाल्ने उद्देश्यले जिल्ला ट्राफिक प्रहरी कार्यालय कालिकोटले “नेपाल प्रहरीको हर्ष, सडक दुर्घटना रहितको वर्ष” अभियान सुरु गरेको छ ।
जिल्ला ट्राफिक प्रहरी कार्यालय कालिकोटका प्रमुख प्रहरी सहायक निरीक्षक हेमराज अधिकारीका अनुसार बढ्दो सवारी दुर्घटना न्यूनीकरण गर्दै जनधनको क्षति कम गर्ने लक्ष्यसहित अभियान सञ्चालन गरिएको हो । उनका अनुसार अभियान अन्तर्गत चालक, सहचालक, यात्रु तथा सर्वसाधारणलाई ट्राफिक नियमबारे सचेत गराइनेछ भने राजमार्ग क्षेत्रमा विशेष निगरानीसमेत बढाइनेछ ।
कर्णालीका घुम्ती सडकहरूमा सानो लापरवाहीले समेत ठूलो दुर्घटना निम्त्याउने गरेको छ । रातिको समयमा तीव्र गति, मदिरा सेवनपछि सवारी सञ्चालन, ओभरलोड तथा क्षमताभन्दा बढी यात्रु बोक्ने प्रवृत्तिले दुर्घटनालाई अझ भयावह बनाएको ट्राफिक प्रहरीको भनाइ छ ।
प्रहरी सहायक निरीक्षक अधिकारीले चालकलाई जिम्मेवार बन्न आग्रह गर्दै भने, “सवारी साधन चलाउँदा केही क्षणको असावधानीले सिंगो परिवार उजाडिन सक्छ । त्यसैले सुरक्षित यात्रा सबैको साझा दायित्व हो ।”
अभियान अन्तर्गत बजार क्षेत्र, विद्यालय, सार्वजनिक स्थल तथा राजमार्गका विभिन्न स्थानमा जनचेतनामूलक कार्यक्रम सञ्चालन गरिने भएको छ । ट्राफिक नियम पालना, सिट बेल्ट र हेल्मेटको अनिवार्य प्रयोग, मापसे गरेर सवारी चलाउन निषेध, ओभरस्पिड नियन्त्रण तथा सवारीको नियमित प्राविधिक परीक्षणका विषयमा विशेष जोड दिइने प्रहरीले जनाएको छ ।
स्थानीयवासीले समेत यस्तो अभियानलाई प्रभावकारी रूपमा निरन्तर सञ्चालन गर्नुपर्ने बताएका छन् । कर्णाली राजमार्गमा हरेक वर्ष हुने दर्दनाक दुर्घटनाले कैयौं परिवारको खुसी खोसेको स्मरण गर्दै उनीहरूले केवल नियम बनाउनेभन्दा त्यसको कडाइका साथ कार्यान्वयन हुनुपर्नेमा जोड दिएका छन् ।
सडक केवल गन्तव्यसम्म पुग्ने बाटो मात्र नभई जीवनसँग जोडिएको संवेदनशील यात्रा भएकाले सबै पक्ष जिम्मेवार बन्न आवश्यक देखिएको छ । दुर्घटना न्यूनीकरणका लागि प्रहरीको प्रयाससँगै चालक, यात्रु र आम नागरिकको सचेत सहभागिता अपरिहार्य रहेको सरोकारवालाहरू बताउँछन् ।