नौबस्ता कारागारका कैदीबन्दीद्वारा भोटेकोशी बाढीपीडितका लागि सहयोग
बाँके, १६ भदौ ।
बाँकेको नौबस्ता कारागारका कैदीबन्दीले भोटेकोशी नदीमा आएको भीषण बाढीबाट प्रभावित नागरिकको उद्धार तथा राहतका लागि आर्थिक सहयोग गरेका छन् । कारागार कार्यालय नौबस्ताको ‘बी’ ब्लकमा रहेका कैदीबन्दीले स्वैच्छिक रूपमा रकम सङ्कलन गरी ४९ हजार ५ सय १० रुपैयाँ प्रधानमन्त्री दैवी प्रकोप उद्धार कोषमा जम्मा गरेका हुन् ।
कारागार कार्यालय नौबस्ताका प्रमुख दलबहादुर बस्नेतका अनुसार बाढीबाट भएको ठूलो मानवीय तथा भौतिक क्षतिप्रति दुःख व्यक्त गर्दै कैदीबन्दीले पीडित नागरिकको सहयोगका लागि आफ्नो क्षमताअनुसार आर्थिक योगदान गरेका हुन् ।
उनले विपद्मा ज्यान गुमाउनेहरूप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरे । साथै, विपद्बाट प्रभावित परिवारको उद्धार, राहत तथा पुनःस्थापनाका लागि आवश्यक सहयोग उपलब्ध गराउन सबै पक्षले आ–आफ्नो स्थानबाट योगदान गर्नुपर्ने बताए ।
प्रमुख बस्नेतले विपद्का बेला मानवीय संवेदना र सामाजिक उत्तरदायित्वलाई प्राथमिकता दिनुपर्ने उल्लेख गर्दै पीडित तथा प्रभावित नागरिकलाई सहयोग गर्नु सबैको साझा दायित्व भएको बताए । कारागारमा रहेका कैदीबन्दीले समेत विपद्का बेला पीडित नागरिकको दुःखमा साथ दिँदै स्वैच्छिक रूपमा सहयोग गर्नु मानवीय संवेदना र सामाजिक उत्तरदायित्वको सकारात्मक उदाहरण भएको कारागार कार्यालयले जनाएको छ ।
