भोटेकोशीको बाढीपछि कर्णालीका एक सय ८५ को अवस्था अज्ञात
सुर्खेत, १२ भदौ ।
भोटेकोशीमा बुधबार आएको भिषण पश्रात कर्णालीका एक सय ८५ जना सम्पर्कविहीन भएका छन् । रसुवा जिल्लास्थित भोटेकोशी नदीमा आएको भिषण बाढीपछि अतुलनीय जनधनको क्षति भएको छ । कर्णाली प्रदेश प्रहरी कार्यालय सुर्खेतले उपलब्ध गराएको यो तथ्यांक हालसम्म आफन्त तथा परिवारका सदस्यले प्रहरी र जिल्ला प्रशासन कार्यालयमा टिपाएको प्रारम्भिक विवरण हो ।
सम्पर्कविहीन हुनेहरुमा कर्णालीका दश जिल्लाबाट सडक तथा जलविद्युत आयोजनामा मजदुरी गर्न गएकाहरु धेरै छन् । साथै, अध्ययन, सरकारी तथा गैर सरकारी संघसंस्थाहरुमा कार्यरत कर्मचारी, सुरक्षा निकायमा कार्यरत व्यक्तिहरुको अवस्था अज्ञात रहेकोे प्रहरीले जनाएको छ ।
हालसम्म उपलब्ध तथ्यांक अनुसार सम्पर्कविहीन हुनेहरुमा एक सय ५३ पुरुष, २५ महिला, चार बालक र तीन बालिका छन् । सम्पर्कविहीन हुनेहरुमा सबैभन्दा धेरै सल्यानका ४८ जना छन् । जिल्ला प्रहरी कार्यालय सल्यानका अनुसार ३५ पुरुष, १० महिला, दुई बालक र एक बालिकाको अवस्था अज्ञात छ ।
सल्यानका प्रहरी प्रमुख प्रहरी नायव उपरीक्षक दीपक पातलीले रसुवा र नुवाकोट जिल्लामा सडक र जलविद्युत आयोजनामा मजदुरी तथा अन्य कामको शिलशिलामा रहेका व्यक्तिहरु परिवारको सम्पर्कमा नरहेको भन्दै विवरण टिपाउने काम जारी रहेकाले यो संख्या अझै बढ्न सक्ने बताए ।
परिवारले तथा आफन्तले टिपाएको विवरण अनुसार सम्पर्कविहीन व्यक्तिहरुको अवस्था बुझ्ने प्रयास जारी रहेको उनले बताए । यस्तै, सुर्खेतका १५ पुरुष एक महिला गरी १६, दैलेखका ६ पुरुष र एक महिला गरी सात जना सम्पर्कविहीन छन् । जाजरकोटका दुई पुरुष, रुकुम पश्चिमका सात पुरुष, चार महिला र एक बालिका गरी १२, जुम्लाका पुरुष ७०, हुम्लाका ६ पुरुष, दुई महिला, एक बालिका गरी नौ जनाको अवस्था अज्ञात छ ।
त्यस्तै, डोल्पाका एक पुरुष, एक महिला, गरी दुई, मुगुका आठ पुरुष, चार महिला, एक बालक गरी १३, कालीकोटका तीन पुरुष, दुई महिला र एक बालक गरी ६ जनाको अवस्था हालसम्म पनि अज्ञात रहेको कर्णाली प्रदेश प्रहरी कार्यालय सुर्खेतका प्रवक्ता एवम् सूचना अधिकारी प्रहरी बरिष्ठ उपरीक्षक सन्तोषसिंह राठोरले जानकारी दिए । उनले यो बढ्न सक्ने बताए ।
प्रभावितलाई काँग्रेस कर्णालीको आर्थिक सहयोग
भोटेकोशीमा आएको भिषण बाढीबाट पीडितहरुको राहत, उद्दार तथा पुनर्स्थापनाका लागि नेपाली काँग्रेस कर्णाली प्रदेश संसदीय दलले आर्थिक सहयोग गर्ने भएको छ । बिहिबार बसेको संसदीय दलको वैठकले २ लाख २५ हजार रुपैयाँ प्रधानमन्त्री दैवी प्रकोप उद्दार कोषमा जम्मा गर्ने निर्णय गरेको हो ।
यो रकम संसदीय दलका १५ जना सदस्यहरुबाट प्रतिव्यक्ति १५ हजार संकलन गरी जम्मा गरिने सांसद बेदराज सिंहले जानकारी दिए । संसदीय दलले उक्त घटनाबाट घाईतेहरुको उपचार, वेपत्ताको खोजी तथा पीडितको राहत, उद्दार र पुनर्स्थापनामा विशेष प्राथमिकता दिन नेपाल सरकार तथा सम्बद्ध सरोकारवालासँग अपिल गर्ने, यसका लागि कर्णाली प्रदेश सरकारलाई पनि आर्थिक सहायता प्रदान गर्न अनुरोध गर्ने निर्णय गरेको छ ।
