ओलम्पिक बिजेता सुशील कुमार पक्राउ, पहलवान राणाको हत्याको आरोपमा १८ दिनदेखि थिए फरार
एजेन्सी । दिल्ली प्रहरीको विशेष दलले ओलम्पिक बिजेता पहलवान सुशील कुमारलाई पक्राउ गरेको छ ।
दुई पटक ओलम्पिक पदक जितेका सुशील कुमार पहलवान सागर राणाको हत्याको मामिलामा फरार थिए ।
प्रहरीका अनुसार उनलाई दिल्लीको मुन्डकाबाट पक्राउ गरिएको छ । भारतका लागि दुई पटक ओलम्पिक पदक जितिसकेका पूर्व विश्व च्याम्पियन पहलवान सुशील कुमार पछिल्लो समय फरार थिए । उनको गिरफ्तारीमा एक लाख भारु इनाम राखिएको थियो ।
सुशील कुमारमाथि पहलवान सागर राणा हत्याकाण्डमा अपहरण, हत्यालगायतका विभिन्न धारामा एफआइआर दर्ता छ ।
३८ वर्षका पहलवान सुशील कुमारबाहेक प्रहरीले ४८ वर्षका अजयलाई पनि पक्राउ गरेको छ । सुशील कुमारमाथि एक लाख भारुको इनाम थियो र अजयमाथि ५० हजारको थियो ।
