काठमाडौं । अन्तिम मौका भन्दै दुई दिने स्पष्टीकरण सोधिएका नेकपा एमालेको नेपाल–खनाल समूह कारबाही रोक्न माग गर्दै सर्वोच्चको ढोका ढकढक्याउन पुगेको छ ।

बुधबार एमाले नेता माधवकुमार नेपाल र झलनाथ खनाल पक्ष अध्यक्ष केपी ओलीले स्पष्टीकरणसहित कारबाही गर्ने चेतावनी दिएपछि उक्त कारबाही रोक्न माग गर्दै सर्वोच्च अदालत पुगेको हो ।

ओलीले नेपाल पक्षका सांसदलाई कारबाही प्रक्रिया अघि बढाएपछि कारबाही रोक्न अदालत गएको नेपाल र खनाल समूहले जनाएको छ ।

यसअघि ओलीले मंगलबार नेपाल समूहका २७ जना संघीय संसद र कर्णाली प्रदेशका ५ जना गरी ३२ सांसदलाई स्पष्टीकरण सोधेका थिए ।

नेकपा एमालेको नेपाल समूहका सांसदले प्रधानमन्त्री तथा पार्टी अध्यक्ष केपी ओलीले सोधेको स्पष्टीकरणको जवाफ दिने निर्णय गरेका छन् ।

नेपालसहित भीम रावल, सुरेन्द्र पाण्डे र घनश्याम भुसाललाई यसअघि पनि स्पष्टीकरण सोधिएकोमा उनीहरुलाई पुनः स्पष्टीकरण सोधिएको छ ।

उनीहरु चारजनाले ३ दिनभित्र र बाँकीलाई २ दिनभित्र जवाफ पेश गर्न भनिएको छ । चारजनाले छुट्टै र बाँकीले अर्कै स्पष्टीकरणको बुझाउने तयारी गरेका छन् ।