काठमाडौँ, १३कार्तिक । 

बढ्दो सडक दुर्घटना, चोटपटक तथा त्यसबाट हुने मृत्यु न्यूनीकरण गर्ने उद्देश्यले स्थानीय सरकारका लागि तयार पारिएको सडक सुरक्षा पुस्तिका सार्वजनिक गरिएको छ । ललितपुरमा आयोजित एक कार्यक्रमबीच सो पुस्तिका सार्वजनिक गरिएको हो ।

स्थानीय तहका जनप्रतिनिधि तथा अधिकारीलाई सडक सुरक्षा योजना निर्माण, कार्यान्वयन र अनुगमनमा सहयोग पुर्‍याउने उद्देश्यले तयार पारिएको उक्त पुस्तिकाले प्रमाणमा आधारित रणनीति, व्यावहारिक योजना निर्माणका उपकरण तथा कार्यान्वयनयोग्य सन्दर्भ सामग्री समेटेको छ ।

काठमाडौँ मेडिकल कलेजस्थित नेपाल इन्जुरी रिसर्च सेन्टरको नेतृत्वमा बेलायतको युनिभर्सिटी अफ द वेस्ट अफ इङ्ल्याण्ड (युडब्ल्युई) ब्रिस्टल र इम्पेरियल कलेज लन्डनको साझेदारी तथा सेफ एन्ड सस्टेनेबल ट्राभल नेपाल (एसएसटिएन) को सहकार्यमा सञ्चालित ‘सेफट्रिप नेपाल’ अनुसन्धान परियोजनाअन्तर्गत उक्त पुस्तिका तयार पारिएको हो ।

परियोजनालाई बेलायतको नेसनल इन्स्टिच्युट फर हेल्थ एन्ड केयर रिसर्चले अनुदान सहयोग गरेको छ । बागमती प्रदेशका बनेपा, बेलकोटगढी, कालिका, पनौती र रत्ननगर नगरपालिका तथा बकैया, भीमफेदी र गल्छी गाउँपालिकामा गठित सामुदायिक सडक सुरक्षा मञ्चसँगको सहकार्यमा पुस्तिका सहनिर्माण गरिएको सेफट्रिप नेपाल अनुसन्धान परियोजनाका समुदाय सहभागिता तथा संलग्नता प्रमुख डा पुष्पराज पन्तले जानकारी दिए ।

उनले पुस्तिकाले स्थानीय तहलाई दुर्घटना बढी हुने स्थान पहिचान गर्न, दुर्घटनाका कारण विश्लेषण गर्न तथा जोखिम न्यूनीकरणका लागि समुदायसँग सहकार्य गर्दै प्रभावकारी कार्यक्रम सञ्चालन गर्न मार्गदर्शन गर्ने जानकारी दिए । सो पुस्तिकमा स्थानीय योजनामा सडक सुरक्षालाई समावेश गर्न, आवश्यक बजेट विनियोजन गर्न र कार्यक्रमको प्रगति अनुगमन गर्न पनि सहयोग पुग्ने अपेक्षा गरिएको छ ।

पूर्वाधार विकास समितिका सभापति आशिष गजुरेलले स्थानीय सडक सुरक्षा व्यवस्थापनमा पालिकाले सक्रिय भूमिका निर्वाह गर्नुपर्ने बताउँदै पुस्तिकामा उल्लेख भएका विषयलाई देशभरका स्थानीय सरकारले अपनाएर सामुदायिक सहकार्यका माध्यमबाट सडक दुर्घटनाबाट हुने अकाल मृत्यु न्यूनीकरणमा योगदान पुर्‍याउने विश्वास व्यक्त गरे ।

उनले यातायात व्यवस्था ऐन र सार्वजनिक सडक ऐन परिमार्जनको प्रक्रियामा रहेको तथा नयाँ सडक सुरक्षा ऐन संसद्मा दर्ता भइसकेको जानकारी दिए । तीनवटै ऐनमा नीतिगत स्पष्टता कायम गरी कार्यसम्पादन सहज बनाउने वातावरण निर्माण गर्न सरकार प्रतिबद्ध रहेको उनको भनाइ थियो ।

युडब्ल्युई ब्रिस्टलका प्राध्यापक तथा सेफट्रिप नेपाल अध्ययनका बेलायत निर्देशक जुली मिटनले सन्देशमार्फत सडकलाई सबै प्रयोगकर्ताका लागि सुरक्षित बनाउन स्थानीय, प्रदेश र सङ्घीय सरकारको सक्रियता आवश्यक रहेको बताए । बेलकोटगढी नगरपालिकाको सामुदायिक सडक सुरक्षा मञ्चकी सदस्य सुप्रिया नेपालले परियोजनामा निरन्तर सहभागिता र सहकार्यले आफ्नो आत्मविश्वास बढाएको बताए ।

रत्ननगर नगरपालिकाका प्रतिनिधि वसन्त रानाले स्थानीय क्लब, नगरपालिका र उद्योग वाणिज्य संघसँगको सहकार्यमा सडक सुरक्षा सचेतना, विद्यालय यातायात सुरक्षा तथा जोखिमयुक्त मोडमा कन्भेक्स ऐना जडानजस्ता कार्यक्रम सञ्चालन भइरहेको जानकारी दिए ।

कालिका नगरपालिकाका मञ्च अध्यक्ष रवि अधिकारीले दुर्घटनाको जोखिम भएका क्षेत्रमा ट्राफिक सङ्केत तथा ड्रम राखिएको र चालु आर्थिक वर्षमा सबै वडामा सडक सुरक्षा सचेतना कार्यक्रम सञ्चालन गर्न रु तीन लाख बजेट विनियोजन गरिएको बताए ।

भीमफेदी गाउँपालिकाका मञ्च सदस्य रामहरि ठकुरीले सडक दुर्घटनाबाट हुने मृत्यु न्यूनीकरण तथा अन्य पालिकाका लागि उदाहरण प्रस्तुत गर्न स्थानीय सडक सुरक्षा कार्यविधि स्वीकृत गर्नुपर्नेमा जोड दिए । गल्छी गाउँपालिकाका मञ्च सचिव राधिका अधिकारीले कार्यविधि स्वीकृत हुन नसके पनि परियोजनाबाट प्राप्त सिकाइ र सहकार्य महत्वपूर्ण रहेको बताउँदै भविष्यमा सडक सुरक्षा कार्यक्रम निर्माण गर्दा प्रस्तावित कार्यविधि उपयोगी हुने विश्वास व्यक्त गरे । काठमाडौँ मेडिकल कलेजको सामुदायिक चिकित्सा विभागका प्रमुख अभिनव वैद्यले सडक सुरक्षाको बहस र पैरवी आवश्यक रहेको बताए ।