चाडपर्वको लामो बिदाले नेपालगञ्जमा रगत अभाव, दैनिक ८० पिन्टसम्म माग

बाँके ,४ मंसिर ।
चाडपर्व लक्षित लामो बिदा तथा नियमित रक्तदान कार्यक्रम पर्याप्त नहुँदा बाँकेको नेपालगञ्जमा रगतको अभाव कायमै रहेको छ । अस्पतालहरूमा बिरामीको चापअनुसार रगतको माग बढिरहे पनि रक्तदान कार्यक्रम अपेक्षित रूपमा सञ्चालन हुन नसक्दा रक्तसञ्चार केन्द्रमा रगतको मौज्दात न्यून भएको हो ।

नेपाल रेडक्रस सोसाइटी, प्रादेशिक रक्तसञ्चार केन्द्र नेपालगञ्जका प्रमुख उपेन्द्र रेग्मीले रगतको अभाव हटाउन नियमित तथा संस्थागत रक्तदान कार्यक्रम सञ्चालन गर्नुपर्ने आवश्यकता औँल्याउनुभयो । उहाँका अनुसार नेपालगञ्जका अस्पतालमा मात्रै दैनिक ७० देखि ८० पिन्टसम्म रगतको माग हुने गरेको छ । तर, मागअनुसार रगत सङ्कलन हुन नसक्दा मौज्दात निकै कम रहेको छ ।

नेपालगञ्जमा सङ्कलित रगत बाँकेका अस्पतालमा मात्रै सीमित नरही लुम्बिनी प्रदेशसहित सुदूरपश्चिम र कर्णाली प्रदेशका बिरामीलाई समेत उपलब्ध गराउनुपर्ने भएकाले रगत व्यवस्थापन थप चुनौतीपूर्ण बनेको प्रमुख रेग्मीले बताउनुभयो ।

उहाँले भन्नुभयो, “नेपालगञ्जका अस्पतालका लागि मात्रै दैनिक ७० देखि ८० पिन्ट रगत माग हुन्छ, तर त्योभन्दा निकै कम मात्रामा रगत मौज्दात रहेको छ ।” उहाँले संस्थागत रूपमा नियमित रक्तदान कार्यक्रम सञ्चालन भए रक्तसञ्चार केन्द्रलाई रगत व्यवस्थापन गर्न सहज हुने बताउनुभयो ।

रक्तसञ्चार केन्द्रले नेपालगञ्जसँगै कोहलपुर र खजुरास्थित शाखाबाट पनि रगत सङ्कलन गर्दै आएको छ । केन्द्रका अनुसार कोहलपुरका आठ अस्पतालमा दैनिक २० देखि २५ पिन्ट र खजुराका दुई अस्पतालमा १० देखि १२ पिन्ट रगतको माग हुने गरेको छ । त्यस्तै, नेपालगञ्जका २७ अस्पतालमा दैनिक करिब ८० पिन्ट रगत आवश्यक पर्ने गरेको छ ।

प्रमुख रेग्मीका अनुसार रगतको माग र आपूर्तिबीच सन्तुलन कायम गर्न नसक्दा कतिपय अवस्थामा बिरामीका आफन्तले रगत उपलब्ध गराएपछि आवश्यक रगत सट्टापट्टाका आधारमा व्यवस्थापन गर्नुपर्ने अवस्था आउने गरेको छ । अहिले केही संस्थाले छिटफुट रूपमा रक्तदान कार्यक्रम सञ्चालन गरे पनि त्यसबाट सङ्कलित रगत पर्याप्त नभएको उहाँको भनाइ छ ।

केही दिनभित्रै अर्को संस्थाले पनि रक्तदान कार्यक्रम आयोजना गर्न लागेको जानकारी दिँदै उहाँले त्यसबाट केही मात्रामा रगत सङ्कलन हुने अपेक्षा व्यक्त गर्नुभयो । यद्यपि, रगतको नियमित आपूर्ति सुनिश्चित गर्न एकाध कार्यक्रमले मात्रै नपुग्ने भएकाले विभिन्न संघसंस्था, सामाजिक अभियान र स्थानीय तहले नियमित रक्तदानलाई प्राथमिकता दिनुपर्ने उहाँले बताउनुभयो ।

नेपाल रेडक्रस सोसाइटी बाँकेका सभापति गोवद्र्धन सम्झनाले विभिन्न माध्यमबाट रक्तदान तथा रगत व्यवस्थापनको काम भइरहेको जानकारी दिनुभयो । उहाँका अनुसार रगत आवश्यक पर्ने बिरामीलाई उपलब्ध गराउने क्रममा रगत लिने र दिने प्रणालीमार्फत पनि अभाव व्यवस्थापन गर्ने गरिएको छ ।

उहाँले रगत अभावका कारण नेपालगञ्जमा ठूलो समस्या उत्पन्न हुन नदिइएको उल्लेख गर्दै आवश्यक परेको अवस्थामा स्वयंसेवी रक्तदाताको सहयोगबाट रगतको व्यवस्था मिलाउने गरिएको बताउनुभयो ।

रक्तदान अभियानमा लामो समयदेखि सक्रिय नेपालगञ्ज–९ निवासी झविन्द्र शर्माले रगतको आवश्यकता बुझेर सबै नागरिकमा रक्तदान गर्ने भावना विकास हुनुपर्ने बताउनुभयो । उहाँले हालसम्म ४५ पटक रक्तदान गरिसक्नुभएको छ ।

“रगत लिएपछि अरूलाई दिन पनि सक्नुपर्छ भन्ने भावना सबैमा हुनुपर्छ,” उहाँले भन्नुभयो, “अहिले जन्मदिन र वैवाहिक उत्सवजस्ता अवसरमा पनि रक्तदान गर्ने प्रचलन बढ्दै गएको छ ।” उहाँले रक्तदानलाई नियमित सामाजिक अभियानका रूपमा विकास गर्न स्थानीय सरकारलाई वर्षमा कम्तीमा दुई पटक भए पनि संस्थागत रक्तदान कार्यक्रम आयोजना गर्न आग्रह गर्नुभयो ।

रगतको अभाव बिरामीको जीवनसँग प्रत्यक्ष जोडिएको विषय भएकाले यसको व्यवस्थापनलाई आकस्मिक अवस्थाको जिम्मेवारीका रूपमा मात्र लिन नहुने सरोकारवालाको भनाइ छ । अस्पतालमा दैनिक हुने रगतको मागलाई सहज रूपमा पूरा गर्न स्थानीय तह, सरकारी तथा गैरसरकारी संस्था, निजी क्षेत्र र नागरिक समाजले नियमित रक्तदान अभियान सञ्चालन गर्न आवश्यक देखिएको छ ।

स्वस्थ व्यक्तिले गरेको एक पटकको रक्तदानले आवश्यक परेका बिरामीको जीवन बचाउन सहयोग पुग्ने भएकाले रक्तदानलाई चाडपर्व वा विशेष अवसरमा मात्रै सीमित नगरी नियमित सामाजिक अभियानका रूपमा अघि बढाउनुपर्ने आवश्यकता देखिएको छ ।

चाडपर्वको लामो बिदाले नेपालगञ्जमा रगत अभाव, दैनिक ८० पिन्टसम्म माग

नेपालगन्जमा हुलाकी सडक विस्तार सुरु, धम्बोझीदेखि नन्दनी

चाडपर्वको लामो बिदाले नेपालगञ्जमा रगत अभाव, दैनिक ८० पिन्टसम्म माग

चाडपर्वको लामो बिदाले नेपालगञ्जमा रगत अभाव, दैनिक

Leave a comment

Your email address will not be published. Required fields are marked *

Leave the field below empty!