बर्दियामा शुक्रबारदेखि सरकारी धान खरिद, चार सय किसानलाई टोकन वितरण गरिने

बर्दिया ,२ मंसिर ।
बर्दियामा खाद्य व्यवस्था तथा व्यापार कम्पनी लिमिटेडले यस वर्षको धान खरिद प्रक्रिया सुरु गर्ने भएको छ । कम्पनीको राजापुर शाखाले आगामी शुक्रबारदेखि राजापुर नगरपालिकामा किसानबाट धान खरिद गर्ने निर्णय गरेको छ । धान बिक्रीका लागि बिहीबार चार सय किसानलाई टोकन वितरण गरी शुक्रबारदेखि खरिद प्रक्रिया अघि बढाइने भएको हो ।

खाद्य व्यवस्था तथा व्यापार कम्पनी लिमिटेड राजापुरका प्रमुख कमलराज पाण्डेका अनुसार बिहीबार चार सय किसानलाई धान बिक्रीका लागि टोकन वितरण गरिनेछ । टोकन प्राप्त गरेका किसानबाट शुक्रबारदेखि धान खरिद गरिने उहाँले जानकारी दिनुभयो । कम्पनीले प्रतिकिसान बढीमा २० क्विन्टलका दरले धान खरिद गर्ने जनाएको छ ।

प्रमुख पाण्डेका अनुसार यस वर्ष पनि बर्दिया जिल्लाका लागि ३० हजार क्विन्टल धान खरिद गर्न स्वीकृति प्राप्त भएको छ । गत वर्षकै परिमाणमा धान खरिद गर्ने अनुमति आएको उहाँले बताउनुभयो । प्राथमिक खरिद समितिको निर्णयअनुसार जिल्लाका आठवटै स्थानीय तहमा प्रतिपालिका तीन हजार क्विन्टलका दरले धान खरिद गर्ने योजना बनाइएको छ ।

यद्यपि, राजापुर नगरपालिकामा धान खरिद सुरु गर्ने तयारी भए पनि जिल्लाका अन्य स्थानीय तहमा भने खरिद प्रक्रिया अझै अन्योलमा रहेको छ । धान खरिदका लागि आवश्यक गोदाम व्यवस्थापन नहुँदा अन्य पालिकामा खरिद प्रक्रिया सुरु हुन नसकेको कम्पनीले जनाएको छ । सम्बन्धित स्थानीय तहले धान भण्डारणका लागि गोदामको व्यवस्था गरेमा तत्कालै खरिद सुरु गर्न सकिने प्रमुख पाण्डेले बताउनुभयो ।

गत वर्ष बर्दियाका छवटा स्थानीय तहमा गोदामको व्यवस्था गरी ३० हजार दुई क्विन्टल धान खरिद गरिएको थियो । यस वर्ष पनि जिल्लाका सबै स्थानीय तहमा खरिद प्रक्रिया सञ्चालन गर्ने लक्ष्य राखिए पनि भण्डारणको व्यवस्थापन चुनौतीका रूपमा देखिएको छ ।

यसैबीच, सरकारले चालु आर्थिक वर्षका लागि धानको न्यूनतम समर्थन मूल्यसमेत बढाएको छ । सरकारले मोटो धानको प्रतिक्विन्टल तीन हजार ६६० रुपैयाँ र मध्यम धानको तीन हजार ८६० रुपैयाँ समर्थन मूल्य निर्धारण गरेको छ ।

गत आर्थिक वर्षमा मोटो धानको न्यूनतम समर्थन मूल्य प्रतिक्विन्टल तीन हजार ४६३ रुपैयाँ र मध्यम धानको तीन हजार ६२८ रुपैयाँ तोकिएको थियो । गत वर्षको तुलनामा यस वर्ष मोटो धानमा प्रतिक्विन्टल १९७ रुपैयाँ र मध्यम धानमा २३२ रुपैयाँ मूल्य वृद्धि भएको छ ।

सरकारले समर्थन मूल्य तोके पनि सबै किसानले सरकारी मूल्यमा धान बिक्री गर्न पाउने अवस्था भने सहज छैन । खरिद कोटा सीमित हुनु, गोदाम व्यवस्थापनमा समस्या हुनु र खरिद प्रक्रिया ढिलो सुरु हुनुले किसानलाई आफ्नो उत्पादन बिक्री गर्न कठिनाइ हुने गरेको छ । त्यसैले समयमै सबै स्थानीय तहमा धान खरिद केन्द्र सञ्चालन गरी किसानको उत्पादन खरिद गर्ने व्यवस्था मिलाउनुपर्ने आवश्यकता देखिएको छ ।

बर्दियामा शुक्रबारदेखि सरकारी धान खरिद, चार सय किसानलाई टोकन वितरण गरिने

होटल व्यवसायी नुर्बु लामा गुठिचौर अध्यक्षको दौडमा

बर्दियामा शुक्रबारदेखि सरकारी धान खरिद, चार सय किसानलाई टोकन वितरण गरिने

बर्दियामा शुक्रबारदेखि सरकारी धान खरिद, चार सय

Leave a comment

Your email address will not be published. Required fields are marked *

Leave the field below empty!