सुर्खेत,२८ चैत ।
मुक्तिनाथ विकास बैंक लिमिटेडले आफ्नो संस्थागत सामाजिक उत्तरदायित्व कार्यक्रम अन्तर्गत सुर्खेतमा खाद्यान्न सामग्री वितरण गरेको छ। बैंकको वीरेन्द्रनगर शाखामार्फत सञ्चालन गरिएको उक्त कार्यक्रममा बादी सरोकार मञ्च नेपालमा आश्रित ११० जना विद्यार्थीलाई करिब एक लाख रुपैयाँ बराबरको खाद्यान्न सामग्री उपलब्ध गराइएको हो।
बैंकले विभिन्न सामाजिक संस्थाहरूसँग सहकार्य गर्दै समाजमा सकारात्मक योगदान पुर्‍याउने उद्देश्यले यस्ता कार्यक्रमहरू सञ्चालन गर्दै आएको जनाएको छ। यसै क्रममा कर्णाली प्रदेशस्थित सुर्खेत जिल्लामा रहेका विद्यार्थीलाई लक्षित गरी खाद्यान्न सहयोग प्रदान गरिएको हो।
बैंकका अनुसार उक्त सहयोगले विद्यार्थीहरूको दैनिक जीवन सहज बनाउनुका साथै अध्ययनप्रति उत्साह बढाउने विश्वास लिइएको छ। विशेषगरी आर्थिक अभावका कारण शिक्षा हासिल गर्न कठिनाइ भोगिरहेका विद्यार्थीहरूलाई यसले राहत मिल्ने अपेक्षा गरिएको छ।
मुक्तिनाथ विकास बैंकले सामाजिक उत्तरदायित्वलाई आफ्नो प्रमुख प्राथमिकतामध्ये एक मानेर स्वास्थ्य, वातावरण संरक्षण तथा वित्तीय साक्षरता जस्ता क्षेत्रमा पनि निरन्तर योगदान पुर्‍याउँदै आएको छ। बैंकले आगामी दिनमा समेत यस्ता सामाजिक सहयोगका कार्यक्रमहरूलाई अझ प्रभावकारी र व्यापक बनाउँदै लैजाने प्रतिबद्धता व्यक्त गरेको छ।
कार्यक्रमको समन्वय वीरेन्द्रनगर शाखाका शाखा प्रबन्धक दीपक कुमार पाण्डेले गरेका थिए।