मुगु छायाँनाथ रारा नगरपालिका–६ मुन्दुगाउँमा सामूहिक हत्या गरिएको घटनाको अनुसन्धान गर्न केन्द्रीय अनुसन्धान ब्युरो (सीआईबी) को टोली मुगु पुगेको छ ।

डीएसपी धर्म भण्डारी नेतृत्वको चार जनाको टोली मुगु पुगेर घटनाको अनुसन्धान सुरु गरेको जिल्ला प्रहरी कार्यालय मुगुका डीएसपी वीरन्द्र थापाले जानकारी दिए ।

उनका अनुसार सीआईबी पुग्नु अघि सुर्खेतबाट दुई टोली र जुम्लाबाट गएको प्रहरीको एक टोलीले अनुसन्धान गरिरहेको थियो । घटनास्थलको अनुसन्धानमा गएको कुकुरसहितको टोली भने नेपालगञ्ज फर्किसकेको प्रदेश प्रहरी कार्यालय कर्णालीका प्रवक्ता गोपालचन्द्र भट्टराइले जानकारी दिए ।

‘सीआईबी टोली पुगिसकेपछि स्थानीय घटनास्थल र अन्य स्थलहरुबाट तीब्र अनुसन्धान भइरहेको छ,’ प्रवक्ता भट्टराइले भने, ‘चाँडै अनुसन्धानको निष्कर्ष निस्कने विश्वास छ ।’

घटनाको अनुसन्धानमा सीआईबी टोली खटिएपछि पीडित परिवारले पनि अनुसन्धान निकर्षमा पुग्ने आशा गरेको छ । छायाँनाथ रारा ६ का वडाध्यक्ष खेमराज रावलले अनुसन्धानमा सीआईबीको प्रवेशले नयाँ आशा जगाएको बताए । ’नौ दिन बितिसक्दा पनि घटनाको दोषी पत्ता नलाग्दा हामी निराश थियौं । तर सीआईबीको टोली आइरहँदा आशावादी भयौं,’ उनले भने ।

घटनाका बारेमा विस्तृत बुझ्नका लागि डीआईजी भीमप्रसाद ढकाल आफैं जिल्ला पुगेका थिए ।
आफन्तहरुले प्रहरीले दोषी पत्ता नलगेसम्म शवहरु नबुझ्ने बताइरहेका थिए । तर, प्रहरीले जसरी पनि घटनामा संलग्न व्यक्तिलाई कारवाहीको दायरामा ल्याउन प्रतिबद्धता जनाएपछि कात्तिक १७ गते मृतकहरुको सामूहिक दाहसंस्कार गरिएको थियो ।

अहिले मृतक श्रीदेवीका श्रीमान दीपक क्रियामा बसेका छन् । छायाँनाथ रारा नगरपालिकाका प्रमुख विष्णुकुमार भामले मृतकका आफन्तलाई सम्झाइ बुझाइ गरेपछि दीपक बोहोरा शव बुझ्न र दाहसांस्कार गर्न सहमत भएका हुन ।

कार्तिक ८ गते बुधवार भएको घटनाको जानकारी प्रहरीले त्यसको दुई दिनपछि १० गते शुक्रवार बिहान मात्रै पाएको थियो । जानकारी पश्चात् घटनास्थल पुगेको प्रहरीले २८ वर्षीय श्रीदेवी बोहोरा, ११ वर्षीय छोरा मनोज, आठ वर्षीय छोरी अप्सरा र ८ महिनाका छोरा रहर बोहोरालाई घरभित्रै मृत अवस्थामा फेला पारेको थियो ।

वैदेशिक रोजगारीको सिलसिलामा कतारमा रहेका मृतक श्रीदेवीका श्रीमान् दीपक बोहोरा घर पुगेपछि सोही दिन प्रहरीले चारैजनाको शव परीक्षणका लागि जिल्ला अस्पताल मुगु पु¥याएको थियो ।