काठमाडौं २९ जेठ ।

बाँकेमा खेलौना (टेड्डी बिअर)भित्र ब्राउन सुगर राखेर तस्करी गरेको आरोपमा प्रहरीले पाँच जनालाई पक्राउ गरेको छ ।  शनिबार बाँके प्रहरीले ऐन्टी ड्रग अपरेसन सञ्चालन गरी पाँच जनालाई लागुऔषध ब्राउन सुगरसहित नियन्त्रणमा लिएको जनाएको छ ।

गोप्य सूचना पाएपछि इलाका प्रहरी कार्यालय जमुनाह र लागुऔषध नियन्त्रण ब्युरो नेपालगन्जबाट प्रहरीको टोली खटिएको थियो । शनिबार राति भारतबाट नेपाल आउँदै गरेका मानिसहरूमाथि प्रहरीले चेक गरेको थियो ।

दाङ लमही नगरपालिका–५ बस्ने सोनु श्रेष्ठ र २० वर्षीय बिशाल कुँवरमाथि प्रहरीले शंका लागेर चेक गरेको थियो। सोनुले बोकेको टेड्डीबिअरभित्र ब्राउन सुगर सात ग्राम फेला पारेको थियो । त्यस्तै, दाङ लमही–५ बस्ने २१ वर्षीय दिवस डाँगी, १७ वर्षीय दुई जना किशोरमाथि पनि प्रहरीले चेक गरेको थियो ।

डाँगीले बोकेको कालो झोलामा लुकाएर राखेको १७ ग्राम ब्राउन सुगर बरामद गरेको हो । उनीहरूमाथि प्रहरीले थप अनुसन्धान अघि बढाएको बताएको छ ।

स्रोत ः सेतोपाटी