बर्दिया निकुञ्जमा एकै महिनामा साढे १४ हजार पर्यटक, आन्तरिक पर्यटकको आकर्षण बढ्दो

बर्दिया ,४ मंसिर ।
बर्दिया राष्ट्रिय निकुञ्जमा पर्यटकको आकर्षण बढ्दै गएको छ । दसैं–तिहारलगायत चाडपर्वको लामो बिदाका कारण कात्तिक महिनामा निकुञ्ज अवलोकन गर्न आउने पर्यटकको सङ्ख्यामा उल्लेख्य वृद्धि भएको छ । एक महिनाको अवधिमा मात्रै १४ हजार ५ सयभन्दा बढी पर्यटकले निकुञ्जको भ्रमण गरेका छन् । तीमध्ये सबैभन्दा ठूलो हिस्सा आन्तरिक पर्यटकको रहेको छ ।

बर्दिया राष्ट्रिय निकुञ्जका अनुसार गत कात्तिक महिनामा १४ हजार ५ सय ४८ पर्यटकले निकुञ्ज अवलोकन गरेका हुन् । तीमध्ये १२ हजार ७ सय ६४ जना नेपाली, १ हजार ५ सय ५० जना विदेशी र २ सय ३३ जना सार्क मुलुकका पर्यटक रहेका छन् ।

निकुञ्जका सूचना अधिकारी एवं सहायक संरक्षण अधिकृत मञ्जु पौडेलका अनुसार कात्तिकमा आएका नेपाली पर्यटकमध्ये ७ हजार ८७ पुरुष र ५ हजार ६ सय ७७ महिला रहेका छन् । यसैगरी सार्क मुलुकबाट आएका पर्यटकमध्ये १ सय ३९ पुरुष र ९४ महिला छन् । विदेशी पर्यटकमा ७ सय ८० पुरुष र ७ सय ७० महिला रहेका छन् ।

कात्तिकको पर्यटक आगमन असोजको तुलनामा उल्लेख्य बढी हो । गत असोज महिनामा बर्दिया निकुञ्ज अवलोकन गर्न जम्मा १ हजार ६ सय २२ पर्यटक मात्रै आएका थिए । बेमौसमी वर्षाका कारण असोजमा पर्यटक आगमन अपेक्षाकृत कम भएको निकुञ्जले जनाएको छ ।

पर्यटन व्यवसायी रामजी थापाका अनुसार दसैं–तिहार कात्तिक महिनामा परेकाले लामो बिदाको अवसरमा घुमफिर गर्न निस्कने आन्तरिक पर्यटकको सङ्ख्या बढेको हो । मुख्यतः पाटेबाघका लागि प्रख्यात बर्दिया राष्ट्रिय निकुञ्ज स्वदेशी तथा विदेशी पर्यटकको आकर्षक गन्तव्य बन्दै गएको उहाँले बताउनुभयो ।

थापाका अनुसार बर्दिया निकुञ्जमा आउने पर्यटकले प्रायः हरेक दिन बाघ अवलोकन गर्ने अवसर पाउने गरेका छन् । बाघसँगै हात्ती, गैँडा, चित्तल, जरायोलगायत वन्यजन्तु अवलोकन गर्न पाइने भएकाले पनि पर्यटकको आकर्षण बढेको उहाँको भनाइ छ । यद्यपि दसैं–तिहारको बिदा सकिएर मंसिर लागेयता भने पर्यटक आगमन केही घटेको उहाँले जानकारी दिनुभयो ।

बर्दिया राष्ट्रिय निकुञ्जको मुख्य प्रवेशद्वार ठाकुरद्वारा हो । रम्मापुरबाट पनि निकुञ्ज प्रवेश गर्न सकिने भए पनि करिब ९९ प्रतिशत पर्यटक ठाकुरद्वाराबाटै प्रवेश गर्ने गरेका छन् । ठाकुरद्वारामा पर्याप्त होटल, यातायात तथा अन्य पर्यटकीय सुविधा उपलब्ध हुनुका साथै निकुञ्जको मुख्यालय पनि यहीँ रहेकाले पर्यटकको पहिलो रोजाइ ठाकुरद्वारा बन्ने गरेको हो ।

पछिल्लो गणनाअनुसार बर्दिया राष्ट्रिय निकुञ्जमा १ सय १२ वटा पाटेबाघ रहेका छन् । यसैगरी निकुञ्जमा करिब १ सय २० वटा हात्ती रहेको अनुमान छ भने गैँडाको सङ्ख्या ३८ रहेको छ । तीमध्ये केही गैँडा सीमावर्ती भारतको कतर्नियाघाट वन्यजन्तु आरक्ष क्षेत्रमा समेत पुगेका छन् ।

निकुञ्ज घुम्न आउने पर्यटकले जिप सफारी तथा पैदल अवलोकनमार्फत वन्यजन्तुको गतिविधि नियाल्ने गरेका छन् । विशेषगरी पाटेबाघ अवलोकन पर्यटकको प्रमुख आकर्षण बन्ने गरेको छ । वन्यजन्तुको प्राकृतिक बासस्थानमै पुगेर अवलोकन गर्न पाइने भएकाले बर्दिया निकुञ्ज वन्यजन्तु तथा प्रकृतिप्रेमी पर्यटकको रोजाइमा पर्दै आएको छ ।

निकुञ्जबाहिर ठाकुरद्वारा क्षेत्रमा ३० भन्दा बढी साना तथा ठूला होटल सञ्चालनमा छन् । यसका साथै डल्ला होमस्टे पनि पर्यटकको रोजाइमा पर्ने गरेको छ । डल्लामा मात्रै झन्डै २० वटा होमस्टे सञ्चालनमा रहेका छन् । होमस्टेमा बस्ने पर्यटकले थारू समुदायको मौलिक संस्कृति, खानपान, रहनसहन र परम्परागत आतिथ्यताको अनुभवसमेत लिन पाउँछन् ।

निकुञ्जबाहेक पर्यटकले खाता जैविक मार्गअन्तर्गत डल्ला, पत्थरबोझीलगायत क्षेत्रको समेत अवलोकन गर्ने गरेका छन् । त्यसैगरी निकुञ्ज परिसरमा रहेको गोही तथा घडियाल प्रजनन केन्द्र, थारू संग्रहालय, दृष्टिविहीन गैँडा र समस्याग्रस्त बाघ राखिएको खोरबाहिरबाट पनि पर्यटकले अवलोकन गर्ने गरेका छन् ।

वन्यजन्तु अवलोकनसँगै स्थानीय संस्कृति, जैविक विविधता र सामुदायिक होमस्टेको अनुभव लिन सकिने भएकाले बर्दिया राष्ट्रिय निकुञ्ज आसपासको क्षेत्र पर्यटकीय गन्तव्यका रूपमा विस्तार हुँदै गएको छ । पर्यटक आगमनमा हुने वृद्धि स्थानीय होटल, होमस्टे, यातायात व्यवसायी तथा स्थानीय उत्पादनको बजार विस्तारका लागि समेत महत्वपूर्ण मानिएको छ । तर, पर्यटकको आगमनलाई वर्षभरि निरन्तरता दिन पूर्वाधार, प्रचारप्रसार र गुणस्तरीय पर्यटकीय सेवा विस्तारमा ध्यान दिनुपर्ने देखिन्छ ।

बर्दिया निकुञ्जमा एकै महिनामा साढे १४ हजार पर्यटक, आन्तरिक पर्यटकको आकर्षण बढ्दो

कोहलपुरमा ट्याक्टरको ठक्करबाट अटोमा सवार एक जनाको

बर्दिया निकुञ्जमा एकै महिनामा साढे १४ हजार पर्यटक, आन्तरिक पर्यटकको आकर्षण बढ्दो

एनपीएल उपाधिका लागि भोलि फाइनलमा सुदूरपश्चिम र

Leave a comment

Your email address will not be published. Required fields are marked *

Leave the field below empty!