धनगढीको फूलबारीमा आधारभूत नगर अस्पताल सञ्चालनमा
धनगढी, १७ कार्तिक ।
कैलालीको धनगढी उपमहानगरपालिका–१८ मा फूलबारी नगर अस्पताल सञ्चालनमा ल्याएको छ । यहाँ आयोजित एक समारोहमा १५ शय्यासहित आधारभूत अस्पताल सेवा शुभारम्भ गरिएको हो ।
कार्यक्रममा उपमहानगर प्रमुख गोपाल हमालले नगर अस्पताल सञ्चालनपछि त्यस क्षेत्रका नागरिकको स्वास्थ्य सेवामा पहुँच विस्तार गर्न उल्लेख्य टेवा पुग्ने विश्वास गरे । उनले आफू नेतृत्वमा आइसकेपछि ग्रामीण क्षेत्रमा स्वास्थ्य, शिक्षालगायत पूर्वाधार स्थापना गरी नागरिकको घर आँगनमा सेवा विस्तार गर्न जोड दिइरहेको बताए ।
उपमहानगर प्रमुख हमालले धनगढीको मुख्य बजार क्षेत्रमा मात्रै विकास केन्द्रित हुँदा यहाँका ग्रामीण क्षेत्रको विकास नहुने भन्दै आफूले नगरलाई विभिन्न पाँच ‘क्लस्टर’ मा विभाजन गरी सबै क्षेत्रको समानुपातिक विकासमा जोड दिइरहेको बताए ।
उपमहानगर स्वास्थ्य शाखा प्रमुख योगेश अवस्थीले एशियाली विकास बैंकको सहयोगमा कोरोना महामारीका समयमा निर्माण भएको भवनमा आधारभूत नगर अस्पताल सञ्चालनमा ल्याइएको बताए । अस्पतालमा पहिलो चरणमा बहिरङ्ग सेवा (ओपिडी), एक्स–रे, प्रयोगशाला र फार्मेसी सेवा सञ्चालनमा ल्याइएको छ । दोस्रो चरणमा अन्तरङ्ग तथा आकस्मिकलगायत सेवा सुरु गरिने उनले बताए । फूलबारी धनगढी बजारबाट करिब १५ किलोमिटर दूरीमा रहेको छ ।
