सुर्खेत ,११ साउन।

सुर्खेतको वीरेन्द्रनगर–१३, करेखोलामा आज विहान एक जना पुरुषले आफ्नै श्रीमतीको हत्या गरेका छन्। जिल्ला प्रहरी कार्यालय सुर्खेतका अनुसार ४२ वर्षीय दानसिंह ठाडा मगरले दाउराको चिर्पट प्रहार गरी ४१ वर्षीया श्रीमती रविना थापाको ज्यान लिएका हुन्।

हत्या गरेलगत्तै ठाडा मगरले प्रहरीलाई फोन गरेर आफैँले अपराधको जानकारी गराएका थिए। प्रहरीका अनुसार उनले सर्वप्रथम वडाध्यक्षलाई फोन गरेर प्रहरीको सम्पर्क नम्बर मागेका थिए। त्यसपछि ठाडा मगरले आफैँ प्रहरीलाई सम्पर्क गरी घटनाबारे जानकारी दिएर पक्राउ गर्न बोलाएका थिए।

प्रहरी खबर पाएलगत्तै नगर प्रहरी र करे खोला प्रहरी चौकीबाट टोली घटनास्थलमा पुगेर उनलाई नियन्त्रणमा लिएको हो। हाल घटनाबारे थप अनुसन्धान भइरहेको जिल्ला प्रहरी कार्यालयका सूचना अधिकारी डीएसपी मोहनजंग बुढथापाले जानकारी दिनुभयो।

हत्या हुनुका कारणबारे यथार्थ तथ्य भने अझै खुलेको छैन। घटनास्थलमा प्रहरीको टोलीले आवश्यक प्रमाण संकलन गरिरहेको छ भने ठाडा मगरलाई हिरासतमा राखेर कानुनी प्रक्रिया अघि बढाइएको छ।

घटनाले घरेलु हिंसाको भयावह रुप र सामाजिक चेतनाको अभाव झल्काउँछ। सुरक्षाकर्मी र स्थानीय तहको चाँडो प्रतिक्रिया प्रशंसनीय भए पनि यस्ता घटनालाई रोक्न दीर्घकालीन सामाजिक र मानसिक स्वास्थ्य सचेतना कार्यक्रमको आवश्यकता रहेको स्थानीयहरू बताउँछन्।