बर्दियामा एक महिनादेखि आतंक मच्चाउँदै आएको समस्याग्रस्त चितुवा पासोमा पर्यो
बर्दिया ,२७ कार्तिक ।
बर्दियाको राजापुर क्षेत्रमा एक महिनादेखि गाउँबस्तीमा पसेर पशुचौपाया मार्दै आएको समस्याग्रस्त चितुवालाई नियन्त्रणमा लिइएको छ । डिभिजन वन कार्यालय, बर्दियाले चार दिनअघि थापेको पासोमा परेर शुक्रबार बिहान चितुवा नियन्त्रणमा आएको हो ।
राजापुर नगरपालिका–३ तिघ्रास्थित सामुदायिक वन नजिक थापिएको पासोमा चितुवा फसेको डिभिजन वन कार्यालय, बर्दियाका वरिष्ठ सहायक वन अधिकृत सन्तोष चौधरीले जानकारी दिनुभयो ।
उहाँका अनुसार विगत एक महिनादेखि उक्त चितुवा गाउँबस्ती आसपासमै बस्दै आएको थियो । चितुवाले गाउँमा पसेर घरपालुवा पशुचौपाया मार्न थालेपछि स्थानीय बासिन्दा त्रसित बनेका थिए ।
यसअघि गत असोज २५ गते सोही वडाको चख्खापुरका ४२ वर्षीय मंगल थारुलाई चितुवाले आक्रमण गरी ज्यान लिएको थियो । मानवमाथि नै आक्रमण गरेर ज्यान लिएको घटनापछि चितुवालाई नियन्त्रणमा लिन वन कार्यालयले विशेष प्रयास गर्दै आएको थियो ।
पासोमा परेको चितुवालाई डिभिजन वन कार्यालय, बर्दिया, राष्ट्रिय प्रकृति संरक्षण कोष र बर्दिया राष्ट्रिय निकुञ्जका प्राविधिक टोलीले संयुक्त रूपमा नियन्त्रणमा लिएका हुन् ।
चितुवा नियन्त्रणमा आएपछि लामो समयदेखि त्रासमा रहेका राजापुर क्षेत्रका स्थानीय बासिन्दाले राहत महसुस गरेका छन् ।
