वीरेन्द्रनगरमा रहेको नौलो होटेलको छतबाट खसेर एक जनाको मृत्यु
वीरेन्द्रनगरमा रहेको एक होटेलको छतबाट खसेर एक जनाको मृत्यु भएको छ । वीरेन्द्रनगर–६ स्थित गोदाम लाइनमा रहेको नौलो होटेलको छतबाट खसेर मृत्यु भएको हो ।
मृत्यु हुनेमा दैलेखको नौमुले गाउँपालिका– ८ बस्ने वर्ष ५१ का दीपबहादुर चन्द रहेको जिल्ला प्रहरी कार्यालय सुर्खेतका (एसपी) एवम् प्रहरी उपरीक्षक रुपेश खड्काले जानकारी दिए ।
उनका अनुसार चन्द होटलबाट कतिबेला खसे भन्नेबारे केही खुलेको छैन । ‘उनी होटेलको पहिलो तलाबाट खसेर उनको मृत्यु भएको हो, तर कतिबेला खसेका हुन् केही खुलेको छैन, उनले भने । ‘हामीलाई आज बिहान ८ः३० बजे जानकारी आएको हो ।’
हाल उनको शव पोष्टमार्टमका लागि प्रदेश अस्पताल कालागाउँ लगिएको र घटनाबारे थप अनुसन्धान भईरहेको प्रहरीले जनाएको छ ।
