काली बहादुर परियार
जुम्ला,६ जेठ ।

राष्ट्रिय प्रजातन्त्र पार्टीका नेता तथा सांसद ज्ञानेन्द्र शाही गृह जिल्ला जुम्ला पुग्ने बित्तिकै विकासे सरकारी कार्यालय माथि खरो रूपमा प्रस्तुत भएका छन् ।

मंगलबार एकाएक जुम्ला पुगेका सांसद शाहीले पूर्वसूचना बिना नै विभिन्न सरकारी कार्यालयमा पुगेर कामको अवस्था बुझ्दै अनुगमनलाई तीव्र बनाएका हुन् ।

सांसद शाहीले सघन शहरी तथा भवन निर्माण आयोजना, सडक डिभिजन कार्यालय जुम्ला लगायत विकास निर्माण सँग सम्बन्धित सरकारी कार्यालयमा पुगेर योजनाको प्रगति, बजेट कार्यान्वयन र निर्माणको वास्तविक अवस्था बारे जानकारी लिएका छन् ।

लामो समय देखि अलपत्र परेका तथा कागजमै सीमित योजना प्रति उनले तीव्र असन्तुष्टि जनाएका छन्। अनुगमनका क्रममा उनले समयमै काम सम्पन्न नगर्ने ठेकेदार र जिम्मेवार निकाय प्रति कडा चेतावनी दिँदै जनताको करबाट आएको बजेट दुरुपयोग गर्न नहुने बताए ।

काम नगरी पटक–पटक म्याद थप्ने प्रवृत्ति अब सह्य नहुने बताउँदै सांसद शाहीले अधुरा योजनाको ठेक्का तत्काल तोडेर नयाँ प्रक्रिया अघि बढाउन सम्बन्धित कार्यालयलाई निर्देशन दिएका छन् ।

सांसद शाहीले निर्माण व्यवसायीलाई लक्षित गर्दै काम नगर्ने ठेकेदार माथि कानुनी कारबाही गरिने चेतावनी समेत दिएका छन् । अब कागजी प्रगति होइन, मैदानमा काम देखिनु पर्ने भन्दै उनले विकास निर्माणमा ढिला सुस्ती गर्ने जोसुकैलाई नछाडिने बताएका छन् ।

उनको अचानक गरिएको अनुगमन पछि जुम्लाका सरकारी कार्यालयहरूमा हलचल बढेको छ भने स्थानीयवासीले पनि विकास निर्माणमा देखिएको सक्रियताप्रति चासो व्यक्त गरेका छन्।