जुन फिल्म रणबीर कपुरले अस्वीकार गरे, त्यसमा अभिनय गरेर स्टार बने रणवीर सिंह
एजेन्सी । आज ६ जुलाईमा बलिउड इन्डष्ट्रिका सबैभन्दा ऊर्जावान् सुपरस्टार रणवीर सिंह आफ्नो जन्मदिन मनाइरहेका छन् । यस्तोमा रणवीर सिंहलाई जन्मदिनको शुभकामनाको ओइरो लागेको छ ।
रणवीरलाई आफ्नो उत्कृष्ट अभिनयका लागि चिनिन्छ । तर के तपाईंलाई थाहा छ, जुन फिल्मले आज उनलाई सुपरस्टार बनाएको छ, त्यो पहिला रणबीर कपुरलाई अफर गरिएको थियो ?
हो, रणवीर सिंहको करियरको चार ठूला फिल्म उनीअघि रणबीर कपुरले पाएका थिए । यसमा उनको डेब्यू फिल्म ब्यान्ड बाजा बारात पनि समावेश छ । यी फिल्मलाई रणबीर कपुरले अस्वीकार गरेका थिए, त्यसपछि मात्रै यो रणवीर सिंहको पोल्टोमा पुग्यो र उनले यसमा काम गरे ।
यशराजको ब्यानरअन्तर्गत बनेको फिल्म ब्यान्ड बाजा बारातले रणवीर सिंहलाई इन्डष्ट्रिमा पहिचान दिलाएको थियो । यसै फिल्मार्फत् उनको र अनुष्का शर्माको जोडीले प्रेम पायो र दुबैको सम्बन्ध पनि सुरु भएको थियो । यद्यपि, फिल्मका लागि निर्माताका लागि पहिलो रोजाई रणबीर कपुर थिए । रणबीरले अस्वीकार गरेपछि यो फिल्म रणवीर सिंहलाई अफर गरिएको थियो ।
