भोट तान्न आकर्षक नारा
कालीकोट,२० कात्तिक ।
उम्मेदवारी मनोनयनदेखि बुधबारसम्म बढीमा २५ जनाको समूहमा घरदैलो गरेका उम्मेदवारले बिहीबारदेखि बृहत् कार्यक्रम आयोजना गर्न थालेका छन । दलका उम्मेदवारले आमसभा, ¥याली, जुलुस र प्रचारप्रसारलाई तीव्र बनाएका छन् ।
अहिले ठाउँठाउँमा चुनावी सभा आयोजना हुन थालेका छन् । कांग्रेस, माओवादी केन्द्र, राष्टिय जनमोर्चासहितको गठबन्धनका प्रतिनिधिसभा सदस्यका उम्मेदवार महेन्द्रबहादुर शाही र प्रदेशसभा १ (२) का उम्मेदवार हिक्मतबहादुर विष्टको टोलीले विकासका प्रतिबद्धता जनाएका छन् । उनीहरू विकट पलाताको राडुनेटा पुगेर खानेपानी, खाद्य डिपोको नियमित सञ्चालन, यातायातको सहज पहुँचलगायतका विकासे प्रतिबद्धता गरेका हुन् ।
वाम लोकतान्त्रिक गठबन्धनका तर्फबाट उम्मेदवार बनेका कर्णाली प्रदेशका पूर्वमुख्यमन्त्री महेन्द्रबहादुर शाहीले पलाताको समृद्धि दिगो विकास, आधारभूत आवश्यकता परिपूर्ति निकासको नारा अघि सारे । उनले आफूले प्रतिनिधिसभा सदस्यमा चुनाव जिते दीर्घकालीन विकासका लागि शिक्षा, स्वास्थ्य, पूर्वाधार विकास र कर्णाली मैत्री नीतिनियम बनाउने बताए ।
आफू ऊर्जामन्त्री भएको बेला उनले कर्णालीमा राष्ट्रिय प्रसारण लाइन पु¥याएको दाबी गरे । संयुक्त गठबन्धनले शुक्रबार महेन्द्रबहादुर शाहीको घर पर्ने पचालझरनाको पडैछा चौरमा चुनावी सभा गरेको छ । जहाँ उम्मेदवारहरूले संविधान बचाउन गठबन्धनलाई जिताउनुपर्ने तर्क गरे ।
एमालेबाट प्रतिनिधिसभाका उम्मेदवार नगिन्द्र शाही र प्रदेशसभाका उम्मेदवार वीरेन्द्रबहादुर बोगटीले सान्नी त्रिवेणीमा मतदाताको घरघरमा पुगेर मत मागिरहेका छन । शाहीले कालीकोटको आर्थिक विकास, स्वरोजगार, शिक्षा, स्वास्थ्य, खानेपानी, सडक, विद्युत्, सिँचाइलगायतका पूर्वाधारसहित कर्णालीमैत्री कानुन बनाउन आफूलाई मत दिनुपर्ने बताए ।
कान्तिपुर
