अभिनेत्री मन्दिरा बेदीका श्रीमान् राज कौशलको हृदयघातका कारण निधन
एजेन्सी । चर्चित अभिनेत्री मन्दिरा बेदीका श्रीमान् राज कौशलको बुधबार बिहान ४९ वर्षको उमेरमा हृदयघातका कारण निधन भएको छ ।
मन्दिरा बेदी र उनका प्रशंसकका लागि यो खबर कुनै ठूलो झट्काभन्दा कम होइन । मन्दिरा र राजका दुई सन्तान छन् । सोसल मिडियामा सेलिब्रिटी र प्रशंसकले राजको निधनमा दुःख जताइरहेका छन् ।
राजको निधनमा शोक जताइरहेका छन् सेलिब्रिटीः
फिल्म निर्देशक ओनिरले राजको निधन पुष्टि गरेका छन् । उनले ट्वीटमा लेखे, ‘असाध्यै छिटो गयौ । हामीले फिल्मनिर्माता राज कौशललाई आज बिहान गुमाएका छौं । असाध्यै दुःखद ।
उनी मेरो पहिलो फिल्म माई ब्रदर निखिलका निर्मातामध्ये एक थिए । उनी ती व्यक्तिमध्ये एक थियो जसले हाम्रो अवधारणालाई विश्वास गरे र हामीलाई समर्थन गरे । भगवानले उनको आत्मालाई शान्ति दिउन् ।’
फिल्मनिर्माता रोनी स्क्रुवालाले राजको आकस्मिक निधनमा हैरानी जताएका छन् । रोनीले राजको परिवारप्रति समवेदना व्यक्त गरेका छन् ।
को थिए राज कौशल ?
राज कौशल व्यावसायिक रुपमा निर्देशक र निर्माता थिए । राजले आफ्नो करियर कपीराइटरको रुपमा सुरु गरेका थिए ।
त्यसपछि उनले निर्देशनमा कदम राखे । राज कौशलले एन्थी कौन है, शादी का लड्डु, प्यार मे कभी कभीजस्ता फिल्म निर्देशन गरेका थिए । यस्तै माई ब्रदर … निखिल, शादी का लड्डु र प्यार मे कभी कभीलाई राजले निर्माण पनि गरेका थिए । राजले थुप्रै एड फिल्म बनाएका थिए ।
मन्दिरा बेदी र राज कौशलको विवाह सन् १९९९ मा फेब्रुअरीमा भएको थियो । १९ जून सन् २०११ मा मन्दिराले छोरा वीरलाई जन्म दिएकी थिइन् ।
अघिल्लो वर्ष सन् २०२० मा मन्दिरा बेदी र राजले ४ वर्षकी बालिकालाई धर्मपुत्रीको रुपमा स्वीकारेका थिए । छोरीको नाम उनीहरुले तार बेदी कौशल राखेका छन् ।
