बाँके ,१९ पुस।
नेपालगन्जमा यही पुस ३० गतेदेखि ‘आठौं प्रादेशिक घरेलु, कृषि, सूचना प्रविधि, पर्यटन तथा औद्योगिक प्रदर्शनी एवं व्यापार महोत्सव’ सञ्चालन हुने भएको छ । महोत्सव नेपालगन्जको कारकाँदोस्थित सडक डिभिजन कार्यालय परिसरमा आयोजना गरिनेछ ।
नेपाल घरेलु तथा साना उद्योग महासंघ बाँकेको आयोजना तथा महिला उद्यमी समिति नेपालगन्ज उपमहानगरपालिका समितिको सह–आयोजनामा महोत्सव गर्न लागिएको हो । शुक्रबार नेपालगन्जमा आयोजित पत्रकार सम्मेलनमा महासंघका अध्यक्ष तथा महोत्सवका संयोजक समरबहादुर खत्रीले आगामी माघ १० गतेसम्म महोत्सव सञ्चालन हुने जानकारी दिए । महासंघ र महिला उद्यमी समितिको आफ्नै कार्यालय भवन निर्माणका लागि आवश्यक स्रोत जुटाउने उद्देश्यले महोत्सव आयोजना गर्न लागिएको अध्यक्ष खत्रीले बताए ।
महोत्सवमा २ सयदेखि २ सय ५० वटासम्म स्टल रहने आयोजकले जनाएको छ । नविनतम प्रविधिजन्य उत्पादन, महिलाद्वारा सञ्चालित उद्यम, स्थानीय स्तरमा उत्पादित वस्तुका स्टल, कृषि तथा वन पैदावार, हस्तकला, ऊर्जा, बायोग्यास, पर्यटन, औद्योगिक तथा व्यापारिक प्रतिष्ठानका स्टलहरू महोत्सवका प्रमुख आकर्षण रहनेछन् ।
महोत्सव सफल बनाउन नेपाल घरेलु तथा साना उद्योग महासंघ तथा महिला उद्यमी समितिका कोहलपुर, खजुरा, बैजनाथ, राप्तीसोनारी, जानकी, डुडुवा र नरैनापुर पालिका समितिले सहकार्य गरिरहेको महोत्सवका सह–संयोजक विष्णुप्रसाद खनालले जानकारी दिए । उनका अनुसार स्थानीय स्रोतको सदुपयोग गरी उत्पादन गरिएका लघु, घरेलु तथा साना उद्योगका वस्तुहरूको दिगो बजार पहुँच स्थापित गर्नु महोत्सवको मुख्य उद्देश्य रहेको छ ।
महोत्सव सञ्चालन अवधिभर स्थानीय तथा राष्ट्रिय स्तरका कलाकारले सांगीतिक प्रस्तुति दिने कार्यक्रम पनि राखिएको छ । आर्थिक समितिका संयोजक तथा महासंघका कोषाध्यक्ष हुमाशंकर ओलीका अनुसार महोत्सव अवधिभर १ लाख ५० हजारदेखि २ लाखसम्म दर्शक भित्र्याउने लक्ष्य राखिएको छ । ‘महोत्सवले लघु, घरेलु तथा साना उद्योगबाट उत्पादित वस्तुको बजार विस्तार मात्र होइन, आर्थिक कारोबार वृद्धि र दर्शकलाई निरन्तर मनोरञ्जन पनि प्रदान गर्नेछ,’ उनले बताए ।
यस महोत्सवले कला, संस्कृति, भेषभूषा, मौलिक तथा सांस्कृतिक महत्व बोकेका विविध झाँकी, बाजा, परम्परागत पेशा र सीपलाई राष्ट्रिय स्तरमा चिनाउन सहयोग पुर्याउने अपेक्षा गरिएको छ । साथै बाँकेका पर्यटकीय गन्तव्यहरूको प्रचार–प्रसार भई जिल्लाको पर्यटन प्रवर्द्धनमा पनि टेवा पुग्ने आयोजकको विश्वास छ ।


