२०८३ मंसिर ७ गते
वीरेन्द्रनगर, सुर्खेत 16°C
कर्णाली प्रदेशको पहिलो राष्ट्रिय दैनिक निष्पक्षता, निर्भिकता, निरन्तरता

दशौँ राष्ट्रिय खेलकुद प्रतियोगितालाई शुभकामना दिँदै नागरिकस्तरबाटै साथ दिन प्रधानमन्त्रीले गरे आग्रह

काठमाडौं ,६ मंसिर ।
प्रधानमन्त्री बालेन्द्र शाह (बालेन) ले दशौँ राष्ट्रिय खेलकुद प्रतियोगितालाई सफल बनाउन कर्णालीवासीलाई नागरिकस्तरबाटै साथ र समर्थन गर्न आग्रह गरेका छन् ।

सामाजिक सञ्जालमार्फत कर्णालीवासीलाई सम्बोधन गर्दै प्रधानमन्त्री शाहले पहिलोपटक कर्णाली प्रदेशमा आयोजना हुन लागेको राष्ट्रिय खेलकुद प्रतियोगिता प्रदेशको भूगोल, संस्कृति, इतिहास र आर्थिक सम्भावनालाई राष्ट्रियस्तरमा चिनाउने महत्वपूर्ण अवसर भएको बताएका हुन् ।
प्रतियोगिताको औपचारिक उद्घाटन मङ्सिर १६ गते सुर्खेतको वीरेन्द्रनगरस्थित कर्णाली प्रदेश रङ्गशालामा हुनेछ । यद्यपि, प्रतियोगिताअन्तर्गतका मुख्य खेलहरू भने मङ्सिर ८ गतेदेखि नै सुरु हुनेछन् ।
दशौँ राष्ट्रिय खेलकुदमा राष्ट्रियस्तरका ८ हजारभन्दा बढी खेलाडी, अफिसियल तथा खेलकुद पदाधिकारी सहभागी हुने प्रधानमन्त्री शाहले उल्लेख गरेका छन् । प्रतियोगिता कर्णाली प्रदेशका विभिन्न जिल्लामा सञ्चालन हुनेछ ।
उनले राष्ट्रिय खेलकुद प्रतियोगिताले नयाँ प्रतिभावान् खेलाडीको पहिचान गर्नुका साथै खेलाडीलाई आफ्नो क्षमता प्रदर्शन गर्ने अवसर प्रदान गर्ने र खेल पूर्वाधार विकासमा समेत योगदान पुर्‍याउने विश्वास व्यक्त गरेका छन् ।
खेलकुद प्रतियोगिता कर्णालीलाई राष्ट्रियस्तरमा चिनाउने माध्यम बन्न सक्ने उल्लेख गर्दै उनले स्थानीय नागरिकको सक्रिय साथ र सहयोगबाट प्रतियोगिता थप प्रभावकारी हुने अपेक्षा गरेका छन् ।
हरेक दुई वर्षमा आयोजना गर्ने लक्ष्यसहित २०३८ सालमा सुरु भएको राष्ट्रिय खेलकुद प्रतियोगिताका हालसम्म नौवटा संस्करण मात्रै सम्पन्न हुनु दुःखद भएको पनि प्रधानमन्त्री शाहले बताएका छन् । अब भने प्रतियोगिताको उद्देश्यअनुसार नियमित आयोजना र यसको स्तर अभिवृद्धिका लागि सरकारले गम्भीरतापूर्वक काम गर्ने उनको भनाइ छ ।
दशौँ राष्ट्रिय खेलकुदले खेलकुद क्षेत्रको विकाससँगै राष्ट्रिय एकता र आपसी सद्भावलाई थप मजबुत बनाउने विश्वास व्यक्त गर्दै प्रधानमन्त्री शाहले प्रतियोगिताको सफल आयोजनाका लागि शुभकामनासमेत दिएका छन् ।

 

 

 

 

 

 

 

 

 

 

दशौँ राष्ट्रिय खेलकुद प्रतियोगितालाई शुभकामना दिँदै नागरिकस्तरबाटै साथ दिन प्रधानमन्त्रीले गरे आग्रह

तेस्रो प्रयासमा सुदूरले उचाल्यो  एनपीएलको उपाधी

दशौँ राष्ट्रिय खेलकुद प्रतियोगितालाई शुभकामना दिँदै नागरिकस्तरबाटै साथ दिन प्रधानमन्त्रीले गरे आग्रह

नेचर रनको उपाधि स्वस्तिका शाही र टेकेन्द्र

Leave a comment

Your email address will not be published. Required fields are marked *

Leave the field below empty!