सरला सुवेदी ।
बाँकेको राप्ती नदीस्थित सिधनिया घाटमा निर्माण भइरहेको ७०० मिटर लामो पुलले राप्ति सोनारी र नरैनापुरका जनताको दशकौँ पुरानो सपना पुरा हुने भएको छ । हुलाकी सडक योजना कार्यालय नेपालगञ्जको आयोजनामा सुरु भएको यस परियोजनाले स्थानीय जनजीवनमा ठुलो परिवर्तन ल्याउने अपेक्षा गरिएको छ । पुल निर्माण सम्पन्न भएपछि राप्ति पारिका बासिन्दा सजिलै नेपालगञ्जसँग जोडिनेछन्, जसले व्यापार, शिक्षा, स्वास्थ्य, र अन्य सेवामा सहजता ल्याउनेछ ।

निर्माण कार्य तीव्र गतिमा अगाडि बढिरहेको भए पनि राज्यको समयमा भुक्तानी दिन नसक्ने समस्याले निर्माणमा अवरोध आउन सक्ने देखिएको छ । ठेकेदार कम्पनी लुम्बिनी रौताहा बन्धन भगवती जेभीका इन्जिनियर राजेश पटेलका अनुसार गत वर्षका १५ करोड रुपैयाँ भुक्तानी गर्न नसक्दा यो वर्ष ९ करोड बराबरको दुईवटा स्पानको काम सम्पन्न भए पनि आगामी कामका लागि चुनौती थपिएको छ ।

हालसम्म २९% कार्य सम्पन्न भएको यस परियोजनामा १४ मध्ये १२ वटा फाउन्डेसन निर्माण भइसकेका छन् । बाँकी रहेका दुई फाउन्डेसन भने नदीको बीचभाग र किनारामा निर्माण गरिनुपर्नेछ। यदि राज्यले तत्काल भुक्तानी समस्या समाधान गर्यो भने निर्माण कार्य सम्झौताको ६ महिना अगाडि नै सम्पन्न हुने ठेकेदार कम्पनीको दाबी छ ।

भ्याटसहित १ अर्ब १९ करोड लागतमा निर्माण भइरहेको यो पुल ११ मिटर चौडा र १.७५ मिटर चौडा फुटपाथसहितको हुनेछ । पुल निर्माण सम्पन्न भएपछि राप्ति पारीका बासिन्दाले नेपालगञ्जसम्म सजिलै यात्रा गर्न सक्नेछन्, जसले स्थानीय व्यापार र सामाजिक जीवनमा सकारात्मक प्रभाव पार्नेछ ।
तर, सरकारको समयमै ध्यान नपुग्ने हो भने निर्माण व्यवसायीहरू थप मर्कामा पर्ने र काम रोकिने सम्भावना रहेको हुलाकी सडक योजना कार्यालयका प्रमुख लिला बहादुर भण्डारीले बताए । निर्माण कार्यले जनताको जीवनमा प्रत्यक्ष प्रभाव पार्ने भएकाले यसतर्फ सरकारको ध्यान केन्द्रित गराउन आवश्यक छ ।

स्थानीय बासिन्दा भने पुल निर्माण कार्य तीव्र गतिमा अघि बढिरहेको देखेर उत्साहित छन् । “यो पुल बनेपछि हाम्रो जीवन सहज हुनेछ । शिक्षा, स्वास्थ्य र व्यापारका लागि नेपालगञ्ज पुग्न समय र पैसा दुवै बचत हुनेछ,” स्थानीय दिनेश मौर्यले बताए ।

यो पुलले बाँकेको पूर्व र पश्चिम जोड्ने मात्र होइन, स्थानीय विकास र समृद्धिको आधारशीला समेत राख्ने विश्वास गरिएको छ । तसर्थ सरकारले तत्काल उनिहरुको माग सम्बोधन गर्न नसके निर्माण कार्यहरुमा निकै असर पर्ने देखिन्छ र निर्माण व्यवसायिहरु निकै मर्कामा पर्ने देखिन्छ्न ।
यो पुलले बाँकेको पूर्व र पश्चिम जोड्ने मात्र होइन, स्थानीय विकास र समृद्धिको आधारशीला समेत राख्ने विश्वास गरिएको छ ।