ज्येष्ठ नागरिकद्वारा विद्यालयलाई पाँच रोपनी जग्गा प्रदान
हुम्ला,२८ मंसिर ।
एक जना ७५ वर्षका ज्येष्ठ नागरिकले विद्यालयलाई निःशुल्क जग्गा सहयोग गरेका छन् । जग्गाको अभाव खेपिरहेको विद्यालयलाई नयाँ भवन निर्माणका लागि सहज बनाउन उनले जग्गा सहयोग गरेका हुन ।
सिमकोट गाउँपालिका – ८ का वडा अध्यक्ष कमल बुढाका अनुसार स्याँडा गाउँका ज्येष्ठ नागरिक सिंहबहादुर बुढाले पाँच रोपनी जग्गा विद्यालयलाई निःशुल्क सहयोग गरेको बताए । गाउँकै सैपाल माध्यमिक विद्यालयलाई उनले सो जग्गा उपलब्ध गराएका हुन ।
जग्गा अभावमा विद्यालयले नयाँ भवन बिस्तार गर्न नसकेको समयमा बुढाले निःशुल्क जग्गा दिएर विद्यालयलाई ठूलो गुन लगाएकाे बताए ।
जग्गा विद्यालयसँगै जोडिएको छ । वडा अध्यक्ष बुढाले विद्यालयले सो जग्गा खरिद गर्ने तयारीमा रहेका बेला उनले जग्गा निःशुल्क सहयोग गरेका कारण सहज भएको बताए । सो जग्गा विद्यालयका नाममा नामसारी समेत भइसकेको छ ।
जग्गा दिएपछि बुढाले विद्यालय सबैको साझा स्थान भएकाले मनैदेखि निःशुल्क दिने इच्छा भएका कारण विद्यालयलाई सो जग्गा उपलब्ध गराएको बताए । सहयोग गरिएको जग्गामा विद्यालयको भवन बन्न सकेमा विद्यार्थीलाई पठनपाठनमा सहज हुने विश्वास व्यक्त गरे ।
गाेरखापत्र
