हत्या प्रयास आरोपमा जेठाजु पक्राउ
सल्यान,२६ मंसिर ।
बुहारीको हत्या प्रयास आरोपमा जेठाजुलाई प्रहरीले पक्राउ गरेको छ । जिल्लाको छत्रेस्वरी गाउँपालिका २ खोरबारेकी सरिता ओलीलाई धारिलो हतियार लिएर मार्ने प्रयास आरोपमा जेठाजु जीवन ओलीलाई प्रहरीले पक्राउ गरेको हो ।
पक्राउ परेका ओलीलाई अहिले जिल्ला प्रहरी कार्यालय सल्यानको हिरासत कक्षमा राखिएको प्रहरी निरीक्षक गोपाल श्रेष्ठले बताए । घरायसी विवादका कारण रिसको आवेगमा आएर शनिबार राति ओलीले बुहारीलाई कुटपिट गरी मार्ने प्रयास गरेको उनले जानकारी दिए ।
उनका अनुसार श्रीमान वैदेशिक रोजगारीमा गएकाले सरिता घरमा बच्चाबच्चीसँग बस्दै आएकी थिइन् । उनी भागेपछि ओलीले बच्चाबच्चीलाई समेत कुटपिट गर्न खोजेका थिए । स्थानीयले बच्चाबच्चीलाई भगाएर बचाएका थिए । सरिता भागेपछि जीवनले जथाभावी हँसिया प्रहार गर्दा घरमा रहेका नौ पशुचौपाया मरेका छन् ।
यता सरिताका आफन्तीले जाहेरी दिने तयारी गरिरहेको र घटनाको अनुसन्धान भइरहेको उनले जानकारी गराए । हाललाई घरायसी विवाद भन्ने गरेपनि वास्तविकता जाहेरीपछि खुल्ने उनीहरूको भनाइ छ ।
कान्तिपुर
