शेखरको टिमबाट चुनाव लड्नेको टुंगो लाग्यो
काठमाडौं : नेपाली कांग्रेसको सभापति पदका उम्मेदवार शेखर कोइरालाको टिमबाट चुनाव लड्ने उम्मेदवारको लगभग टुंगो लागेको छ।
कोइरालाको टिमबाट डा। मिनेन्द्र रिजाल र गगनकुमार थापा महामन्त्रीको उम्मेदवार बन्ने भएका छन्। महामन्त्रीमा विश्वप्रकाश शर्मालाई ल्याएर डा। रिजाललाई उपसभापतिमा लैजाने छलफल भए पनि कुरो नमिलेको एक नेताले जानकारी दिए।
ति नेताका अनुसार अरु पदाधिकारी र केन्द्रीय सदस्यहरुको टिम बनाउने काम भइरहेको छ। स्रोतका अनुसार कोइरालाको टिमबाट उपसभापतिमा चन्द्र भण्डारीको नाम निश्चित भएको छ। अर्का उपसभापतिमा रामशरण महत र महेश आचार्यमध्ये एक जना तय गर्ने विषयमा छलफल चलिरहेको बुझिएको छ।
यस्तै सह–महामन्त्रीमा खसआर्यबाट देवराज चालिसे, महिलाबाट कमला पन्त, दलितबाट जीवन परियार, मधेसीबाट रामकृष्ण यादव, मुस्लिमबाट शेख वकिल र थारुबाट तेजुलाल चौधरीको नाम लगभग टुंगो लागेको छ।
जनजाति र पीछडिएको क्षेत्रबाट सहमहामन्त्रीको उम्मेदवारबारे पनि छलफल चलिरहेको छ। रामचन्द्र पौडेल सभापतिको उम्मेदवार नबन्ने भएपछि यो समूहका नेताहरूले कोइरालाको नेतृत्वमा टिम बनाएको हो।
