प्रदेश योजना आयोगका उपाध्यक्षले लिए शपथ
सुर्खेत, २६ असोज ।
कर्णाली प्रदेश योजना आयोगका नवनियुक्त उपाध्यक्ष डा भीमबहादुर खत्रीले पद तथा गोपनीयताको शपथ ग्रहण गरेका छन् । आइतबार मुख्यमन्त्री मंगलबहादुर शाहीले खत्रीलाई शपथ गराएका हुन् । जुम्लाको तातोपानी गाउँपालिका निवासी खत्री कृषि विज्ञ हुन् । शुक्रबार बसेको कर्णाली प्रदेश मन्त्रिपरिषद् बैठकले उनलाई योजना आयोगको उपाध्यक्ष नियुक्त गर्ने निर्णय गरेको थियो ।
प्रदेश प्रमुख यज्ञराज जोशीले उनलाई उपाध्यक्षमा नियुक्त गरेका थिए । प्रदेशको नीति तथा योजना निर्माणमा भूमिका खेल्ने योजना आयोग साउनयता रिक्त थियो । गत १२ साउनमा नेकपा एमाले नेतृत्वको सरकार परिवर्तन भएपछि आयोगको उपाध्यक्ष पद रिक्त बनेको थियो ।
