खलंगा बजारको ढलको बिजोग
रूकुम पश्चिम,१२ मंसिर ।
रूकुम पश्चिमको सदरमुकाम मुसीकोट नगरपालिका–१ खलंगा बजारको ढल बराहटाकुरास्थित टुँडिखेलमा असरल्ल परेको छ ।
दुईवर्ष अघि संघीय सहरी विकास कार्यालयले बजारभित्रको सडक र ढलको सुधार तथा व्यवस्थापनका लागि काम गरेपनि यो काम भने अधुरै छोडेको १ नं. वडा अध्यक्ष ज्ञानुचन्द्र चन्दले बताए । यो काम सम्पन्न नहुँदा परेको असरप्रति आफूहरू जानकार रहेको र नगरपालिकालाई अवगत गराएको अध्यक्ष चन्दको भनाइ छ ।
दुई वर्षदेखि यसरी नै बगिरहेको फोहोर पानीले खेल मैदान र पिपलनेटा जाने सडकलाई समेत असर गरेको स्थानीय कर्णबहादुर खड्काले गुनासो गरेका छन् । यस विषयमा नगरपालिकाले देखेपनि नदेखेझैं गरेको खड्काको आरोप छ ।
बर्खामा बजारको भल पनि यही भएर बग्ने गरेकाले झन् ठूलो असर गर्ने गरेको छ ।यो समस्या समाधानका लागि नगरपालिकाबाट प्रदेश सरकारमा अनुरोध गरेको यदि प्रदेशबाट समाधान नभए नगरले गर्ने वडाअध्यक्ष चन्दले जानकारी दिए ।
कान्तिपुर
