गाेल्डेन बुढा

जुम्ला ,१० जेठ।
बाजुराको हिमाली गाउँपालिका–२ मा भएको घटनापछि पीडितको माग सम्बोधनमा राज्य उदासीन बनेको आरोप लगाउँदै हिमाली युवा सञ्जाल, बाजुराले अनिश्चितकालीन कर्णाली बन्दको घोषणा गरेको छ ।सञ्जालले शनिबार जारी गरेको विज्ञप्तिमा विभिन्न सरकारी निकायसँग २४ घण्टासम्म निरन्तर समन्वय र संवाद गर्दा पनि कुनै ठोस निर्णय तथा सम्बोधन नभएको उल्लेख गर्दै जेठ १२ गते बिहान ५ बजेदेखि कर्णाली प्रदेशभर बन्द आह्वान गरिएको जनाएको हो ।विज्ञप्तिमा घटनास्थलको स्थलगत अनुगमन गरी दीर्घकालीन समाधान खोज्न, हुम्लाको सर्केगाड गाउँपालिका–३, ४ र ५ तथा सिमकोट गाउँपालिका–१ र २ का पीडित परिवारलाई तत्काल राहत उपलब्ध गराउन माग गरिएको छ ।त्यस्तै, सम्बन्धित गाउँपालिकाको सिफारिसका आधारमा पीडितलाई उपचार, राहत र आवश्यक सहयोग सुनिश्चित गर्न, हिमाली गाउँपालिका–३ मा व्यायामशाला निर्माणका क्रममा विस्थापित परिवारलाई उचित व्यवस्थापनसहित क्षतिपूर्ति दिन तथा चेकजाँच भवननिर्माण नभएका स्थानमा तत्काल पूर्वाधार निर्माण अघि बढाउन सरकारसँग आग्रह गरिएको छ ।

सञ्जालले घटनामा ज्यान गुमाएकाप्रति श्रद्धाञ्जली व्यक्त गर्दै दोषीमाथि कडा कारबाही, पीडितलाई न्याय र राज्यको ध्यानाकर्षण गराउन बाध्य भएर कर्णाली राजमार्ग बन्द गर्नुपरेको जनाएको छ ।विज्ञप्तिमार्फत प्रधानमन्त्री तथा मन्त्रिपरिषद्को कार्यालय, कर्णाली प्रदेश सरकार, मुख्यमन्त्री तथा मन्त्रिपरिषद्को कार्यालय, जिल्ला प्रशासन कार्यालय बाजुरा र हुम्लालाई समेत औपचारिक रूपमा ध्यानाकर्षण गराइएको छ ।दुर्गम भेगका नागरिकको पीडा पटक–पटक बेवास्ता हुँदा अन्ततः सडक नै विरोधको भाषा बन्न पुगेको स्थानीयको गुनासो छ ।