१२, भदौ २०८२

बाँके । पश्चिम नेपालकै ठूलो व्यापारिक नाका नेपालगञ्ज भन्सार कार्यालयले चालु आर्थिक वर्ष २०८२/०८३ को पहिलो महिनामा (साउन) निर्धारण गरिएको राजस्व लक्ष्यको ७४ प्रतिशत मात्रै असुली गरेको छ ।

भन्सार कार्यालयका अनुसार साउन महिनामा एक अर्ब ८६ करोड ६५ लाख ४६ हजार रुपैयाँ राजस्व सङ्कलन गर्ने लक्ष्य निर्धारण गरिएको थियो । तर, जम्मा एक अर्ब ३८ करोड ३७ लाख ८४ हजार रुपैयाँ मात्रै राजस्व उठाउन सकिएको छ, जुन कुल लक्ष्यको ७४.१४ प्रतिशत हो ।

चालु आवका लागि नेपालगञ्ज भन्सार कार्यालयले २४ अर्ब ५४ करोड ५७ लाख ८२ हजार रुपैयाँ राजस्व असुली गर्ने लक्ष्य लिएको छ । यसअघि आव २०८१/०८२ मा पनि २७ अर्बभन्दा बढी लक्ष्य निर्धारण भए पनि जम्मा २० अर्ब २८ करोड ७२ लाख रुपैयाँ मात्रै राजस्व सङ्कलन भएको थियो ।

भन्सार कार्यालयले एकीकृत जाँच चौकी सञ्चालनमा आएपछि आयात–निर्यात बढ्ने र राजस्व असुलीमा वृद्धि हुने अपेक्षा गरे पनि लागत बढेको भन्दै केही मालवाहक सवारी साधनहरूले वैकल्पिक नाका रोजेपछि राजस्व सङ्कलनमा कमी आएको जनाएको छ ।

नेपालगञ्ज भन्सारबाट उठ्ने कुल राजस्वमध्ये करिब ५० प्रतिशत पेट्रोलियम पदार्थको आयातबाट हुने गरेको छ । त्यस्तै, इन्धनसँगै चामल, खाद्यान्न, फलाम लगायतका वस्तु आयातबाट पनि महत्वपूर्ण मात्रामा राजस्व संकलन हुने गरेको तथ्याङ्क कार्यालयले जनाएको छ ।