बाँके,२१ असोज ।

नेपालगञ्ज विमानस्थलको प्रतीक्षा कक्षमा सृजना रावल उदास अनुहार लिएर टिकट काउन्टरतिर हेर्दै थिइन्। काठमाडौँ पुग्ने उनको योजना आज पनि अधुरो रह्यो। उनले गुनासो गर्दै भनिन्, “पर्वको बेला छुट पाए राहत हुने थियो, तर यहाँ त हवाई टिकट नै दोब्बर भइसकेको छ, यो के न्याय हो?”

सृजनाजस्तै सयौं यात्रु अहिले नेपालगञ्ज, धनगढी, सुर्खेत, पोखरा र काठमाडौँका विमानस्थलमा निराश मुद्रामा छन्। सडक अवरुद्ध भएपछि हवाई बाटो नै एकमात्र विकल्प बनेको छ, तर त्यही बाटो पनि अहिले धनीहरूको विशेषाधिकारजस्तो बनेको यात्रुहरूको गुनासो छ।

स्थलमार्ग बन्द, आकाश पनि महँगो

बाँके–बर्दियादेखि काठमाडौँसम्मको सडक वर्षायामले थिलथिलो हुँदा धेरैका लागि हवाई यात्रा मात्र विकल्प बनेको छ। तर विमान कम्पनीहरूले “पर्व विशेष” भन्दै टिकट दर दुईदेखि तीन गुणा बढाएका छन्।
नेपालगञ्जका मनिश रावत भन्छन्, “सडक बन्द भयो भने विमान कम्पनीले सिजन भाडा भन्दै मनलाग्दी मूल्य लिन्छन्। त्यो पनि नागरिक उड्यन प्राधिकरणकै अनुमतिमा।”

नियामक कि सहयोगी निकाय ?

गैरसरकारी संस्था महासंघका केन्द्रीय सचिव नमस्कार शाह भन्छन्, “नागरिक उड्यन कार्यालयले विमान कम्पनीहरूको मनोमानीलाई संस्थागत बनाएको छ। सेवाग्राहीमाथि आर्थिक भार थप्ने यस्तो नीतिगत निर्णय सुशासनविपरीत छ।”
उनका अनुसार, “भ्रष्टाचार नियन्त्रणको नारा दिने सरकारले आफ्नै नियामक निकायमार्फत नीतिगत भ्रष्टाचार हेरेर मौन बस्नु जनताको अपमान हो।”

‘हवाई टिकट अब आवश्यकता हो’

नेपालगञ्जमा भेटिएकी पोखराकी निर्माला सापकोटा भन्छिन्, “स्थलमार्ग बन्द हुँदा हामीलाई विमानकै भरोसा हुन्छ। तर अहिले त्यो भरोसा पनि चर्को भाडाको बोझमा दबिएको छ। हवाई टिकट अब लक्जरी होइन, आवश्यकता हो।”
स्थानीयहरूका अनुसार, सामान्य आय भएका नागरिकका लागि अहिले हवाई यात्रा ‘आकाशको सपना’ बनेको छ।

पर्वमा राहत होइन, शोषण

पर्व खुशी र पारिवारिक भेटघाटको समय हो, तर हवाई बजारमा भने पर्व नाफा असुल्ने अवसर बनेको यात्रुहरूको आरोप छ। विमान कम्पनीहरूले सिजन भाडा भन्दै दर बढाउँछन् र नागरिक उड्यन प्राधिकरण मौन रहन्छ।

यात्रुहरूको माग छ — “पुरानै दर कायम गर, जनमैत्री नीति बनाऊ, नाफाभन्दा नागरिक केन्द्रित सेवा देऊ।”
सृजना रावल भन्छिन्, “सरकारले हाम्रो आवाज सुन्नुपर्छ। नागरिक उड्यन प्राधिकरणले तत्काल पुनरावलोकन गरी व्यवहारिक दर कायम गर्नुपर्छ, त्यो नै न्याय हो।”

यदि यस्तो मनलाग्दी भाडा रोकिएन भने यात्रुहरूको भनाइमा
“आकाश खुला होइन, महँगो जेल बन्नेछ।”