कर्णाली प्रदेशसभाको प्रमुख प्रतिपक्षकाे मान्यता दिन राप्रपाको माग
सुर्खेत । राष्ट्रिय प्रजातन्त्र पार्टीकी सांसद सन्तोषी शाहीले कर्णाली सभामा प्रमुख प्रतिपक्षको मान्यता दिन माग गरेकी छन् । नेपाली कांग्रेस, नेकपा एमालेले मुख्यमन्त्री राजकुमार शर्मालाई विश्वासको मत दिएसँगै राप्रपाले प्रतिपक्ष दलको हैसियत माग गरेको हो ।
यसअघि नेपाली कांग्रेसले प्रतिपक्षको भूमिका गर्दै आएको थियो । प्रदेशसभाको ११ औँ बैठकमा राप्रपा सांसद सन्तोषी शाहीले राप्रपालाई प्रतिपक्ष दलको सिटको व्यवस्थापन गरिदिन माग गरिन् ।
गत शुक्रवार मुख्यमन्त्री राजकुमार शर्मालाई राप्रपा बाहेकका सबै दलले विश्वासको मत दिएका थिए । ‘सबै दलले सरकारको पक्षमा मतदान गर्ने, सरकारको मन्त्री भइरहने अनि ती दलहरू प्रतिपक्षको रूपमा कसरी रहन सक्छन्,’ सांसद शाहीले प्रश्न गरिन् । ‘दुनियाँमा कहीँ नभएको जात्रा हाडिगाउँमा’ भनेजस्तै संसदीय व्यवस्थामा यस्तो प्रवृत्ति कहिँपनि नभएको शाहीको भनाइ छ । सांसद शाहीले भनिन्,` सांसद संख्या कम देखिए पनि ढिलोचाँडो राप्रपाको सिद्धान्तमा नआइ सुखै छैन । राष्ट्र निर्माण र देश विकासको लागि सत्यको बाटो नै राप्रपाले लिएको हो ।’
