डोल्पोबुद्ध गाउँपालिकामा सकियो वार्षिक परीक्षा
डोल्पा, २३ कार्तिक ।
डोल्पाको डोल्पोबुद्ध गाउँपालिकाका सामुदायिक विद्यालयमा वार्षिक परीक्षा सञ्चालन गरिएको छ । डोल्पोबुद्धका ६ विद्यालयमध्ये ५ विद्यालयले नतिजासमेत सार्वजनिक गरिसकेका छन् । पेमा गुरुङ २ र ४ नम्बर वडाका बाल विकास केन्द्र, सिद्धार्थकुला आधारभूत, टसी गोमाङ बाल विकास केन्द्र र इन्द्रधनुष आधारभूत विद्यालयले वार्षिक परीक्षा सकेका हुन् ।
उनका अनुसार यस वर्ष सरकारी निकायले परीक्षा सञ्चालनमा सहयोग नगरेपछि विद्यालय व्यवस्थापन समिति र अभिभावकको सक्रियतामा परीक्षा सञ्चालन गरिएको हो । कोरोनाको प्रभाव गाउँमा खासै नपरेकाले सामुदायिक विद्यालयले पठनपाठन गरेर परीक्षासमेत सकेको गाउँपालिकाका प्रमुख प्रशासकीय अधिकृत गौतम पंज्ञानीले बताए । ‘पठनपाठन र परीक्षा नियमित तालिकाअनुसार नै भयो,’ उनले भने, ‘नतिजा प्रकाशन गरेर ५ विद्यालय बन्द भइसकेका छन् ।’ यही समयमा वार्षिक परीक्षा सक्नुपर्ने उपल्लो डोल्पाको छार्काताङसोङ गाउँपालिकाका ४ विद्यालयले पनि वार्षिक परीक्षाको नतिजा सार्वजनिक गरिसकेका छन् । ३ विद्यालयको पठनपाठन भने बन्द रहेको शिक्षा, युवा तथा खेलकुद शाखाका कर्मचारी भक्तबहादुर बुढाले बताए ।
उनका अनुसार कोरोनाका कारण ३ विद्यालयमा पठनपाठन भएन । शेफोक्सुण्डो गाउँपालिकाका विद्यालय पनि वार्षिक परीक्षाको तयारीमा छन् । विद्यार्थीहरु परीक्षाको तयारीमा जुटेको गाउँपालिकाका प्रमुख प्रशासकीय अधिकृत विष्णुप्रसाद न्यौपानेले बताए । ‘कोरोनाको संक्रमण नभएपछि विद्यालयहरु नियमित चलिरहेकाले तालिकाअनुसार नै परीक्षा हुनेछ,’ उनले भने, ‘१२ वटै विद्यालयले हिमपातअघि नै नतिजा प्रकाशन गरिसक्नेछन् ।’
