काठमाडौं, २६ जेठ ।
नेपालको औद्योगिक क्षेत्रका अग्रणी कम्पनीमध्ये एक लिटमस इन्डस्ट्रिज लिमिटेडले नेपाल उद्योग परिसंघ (सिएनआई) को २३औँ वार्षिक साधारण सभामा ‘भारततर्फ सबैभन्दा बढी निकासी गर्ने उद्योग’ विधाअन्तर्गत प्रतिष्ठित सम्मान प्राप्त गरेको छ। सिएनआईका सदस्य उद्योगहरूमध्ये भारततर्फ सर्वाधिक निर्यात गर्ने उद्योगका रूपमा लिटमसलाई उक्त सम्मान प्रदान गरिएको हो।
यस सम्मानले गुणस्तर, नवप्रवर्तन तथा उत्पादन उत्कृष्टताप्रति कम्पनीको निरन्तर प्रतिबद्धतालाई उजागर गरेको छ। साथै नेपालको औद्योगिक क्षमता अभिवृद्धि, निर्यात विस्तार तथा राष्ट्रिय अर्थतन्त्रमा योगदान पुर्‍याउने लिटमसको प्रयासको औपचारिक कदरसमेत भएको कम्पनीले जनाएको छ।
लिटमस इन्डस्ट्रिज लिमिटेड नेपालकै सबैभन्दा ठूलो तार, केबल तथा कन्डक्टर उत्पादक उद्योग हो। साथै, नेपालमा एल्युमिनियम तथा एल्युमिनियम अलोय (एएल) रड उत्पादन गर्ने एकमात्र उद्योगका रूपमा कम्पनीले विशिष्ट पहिचान स्थापित गरेको छ। अन्तर्राष्ट्रियस्तरको गुणस्तर र अत्याधुनिक उत्पादन प्रणालीमार्फत कम्पनीले स्वदेशी उद्योगलाई सुदृढ बनाउँदै क्षेत्रीय बजारमा नेपाली उत्पादनको प्रतिस्पर्धात्मक उपस्थितिलाई थप मजबुत बनाएको छ।
कम्पनीका उत्पादनहरूले देशका विभिन्न ऊर्जा तथा पूर्वाधार परियोजनाको आवश्यकता पूरा गर्नुका साथै नेपालको औद्योगिक निर्यात वृद्धिमा महत्वपूर्ण योगदान पुर्‍याउँदै आएका छन्। निर्यात उपलब्धिसँगै कम्पनीले प्रत्यक्ष तथा अप्रत्यक्ष रूपमा हजारौँ रोजगारी सिर्जना गर्नुका साथै आयात प्रतिस्थापन र सहायक उद्योगहरूको विकासमा समेत उल्लेखनीय भूमिका खेलेको छ।
उत्पादन क्षमता विस्तार, आधुनिक प्रविधिको प्रयोग तथा दक्ष जनशक्ति विकासमा निरन्तर लगानी गर्दै आएको लिटमसले नेपालको दीर्घकालीन आर्थिक समृद्धिमा समेत योगदान पुर्‍याइरहेको छ।
सम्मान प्राप्तिपछि कम्पनीका मुख्य सञ्चालन अधिकृत (सीओओ) प्रकाश काफ्लेले यो उपलब्धि सम्पूर्ण लिटमस परिवारको सामूहिक मेहनत, समर्पण र प्रतिबद्धताको परिणाम भएको बताउनुभयो। उहाँले नेपाल उद्योग परिसंघप्रति आभार व्यक्त गर्दै आगामी दिनमा पनि निर्यात विस्तार, अन्तर्राष्ट्रिय बजारमा उपस्थिति सुदृढीकरण तथा नेपालको औद्योगिक विकासमा योगदान पुर्‍याउने प्रतिबद्धता दोहोर्‍याउनुभयो।
“नेपालको अग्रणी तार, केबल तथा कन्डक्टर उत्पादक तथा एल्युमिनियम र एएल रडको एकमात्र उत्पादक उद्योगका रूपमा हामीले ग्राहकप्रति मात्र नभई नेपालको औद्योगिक भविष्यप्रति पनि विशेष जिम्मेवारी वहन गरेका छौँ,” उहाँले भन्नुभयो, “यो सम्मानले हामीलाई अझ उच्च लक्ष्य हासिल गर्न थप प्रेरणा प्रदान गरेको छ।”
कम्पनीका अनुसार यस सम्मानले नेपालको औद्योगिक उत्कृष्टता, उत्पादन क्षमता तथा निर्यात प्रतिस्पर्धात्मकताको प्रतिनिधि संस्थाका रूपमा लिटमस इन्डस्ट्रिज लिमिटेडको स्थानलाई थप सुदृढ बनाएको छ। आगामी दिनमा पनि कम्पनीले क्षमता विस्तार, प्रविधि विकास तथा गुणस्तर अभिवृद्धिमा निरन्तर लगानी गर्दै आत्मनिर्भर, प्रतिस्पर्धी र समृद्ध नेपालको औद्योगिक विकासमा योगदानलाई अझ प्रभावकारी बनाउने लक्ष्य लिएको जनाएको छ।