बाँके, १ कार्तिक  ।

चाडपर्वको माहोलसँगै बाँकेमा सुरक्षालाई प्राथमिकता दिँदै प्रहरीले कडा निगरानी थालेको छ । तिहार र छठ पर्वलाई शान्तिपूर्ण र सुरक्षित वातावरणमा मनाउन जिल्लाभर उच्च सुरक्षा सतर्कता अपनाइएको बाँकेका प्रहरी नायव उपरीक्षक (डीएसपी) दीपक पातलीले जानकारी दिए ।

उनका अनुसार तिहारका समयमा हुने आतसबाजीका कारण आगलागी र सवारी दुर्घटनाको सम्भावना रहँदा त्यसलाई न्यून गर्न विशेष रणनीति बनाइएको छ । साथै लागुऔषधको अवैध कारोबार, चोरी, जुवातास र अन्य आपराधिक गतिविधि नियन्त्रणका लागि प्रहरीले विशेष ध्यान दिएको छ ।

“पर्वलाई शान्तिपूर्ण र सुरक्षित बनाउन हामीले नियमित चेकजाँचलाई अझ प्रभावकारी बनाएका छौँ,” डीएसपी पातलीले भने, “आवश्यक स्थानहरूमा अतिरिक्त प्रहरी पोष्ट स्थापना गरिएको छ र संयुक्त चेकजाँच पनि सुरु भइसकेको छ ।”

ट्राफिक व्यवस्थापनमा विशेष ध्यान

तिहार र छठका बेला यात्रुको चाप बढ्ने भएकाले ट्राफिक व्यवस्थापनलाई विशेष प्राथमिकता दिइएको छ । सवारी साधनको अत्यधिक आवागमन हुने क्षेत्रहरूमा प्रहरीको विशेष टोली खटाइएको छ ।

साथै, सवारी चालकहरूलाई ट्राफिक नियमको पूर्ण पालना गराउन सचेतना अभियान सञ्चालन गरिएको छ । यात्रुको सहजताका लागि जिल्लाभर ४ वटा यात्रु सहायता कक्ष स्थापना गरिएको छ, जसले यात्रुलाई आवश्यक जानकारी र सहयोग प्रदान गर्नेछ ।

१२ सय सुरक्षाकर्मी परिचालन

डीएसपी पातलीका अनुसार बाँकेमा करिब १२ सय सुरक्षाकर्मी परिचालन गरिएका छन् । नेपाल प्रहरीका अन्य युनिटबाट मात्रै ३ सय बढी प्रहरी थप गरी सुरक्षा व्यवस्थालाई अझ सुदृढ बनाइएको छ । सम्भावित जोखिम क्षेत्रहरूलाई प्रहरी निगरानीमा राखिएको छ र नियमित पेट्रोलिङ बढाइएको छ ।

धार्मिक सद्भाव र सामाजिक शान्तिको सुनिश्चितता

तिहार र छठजस्ता सामूहिक पर्वका बेला धार्मिक सद्भाव र सामाजिक सहकार्य कायम रहोस् भन्ने उद्देश्यले प्रहरीले विशेष सतर्कता अपनाएको छ । विभिन्न समुदायबीच आपसी समझदारी बढाउन स्थानीय नेतृत्व र समुदायसँग समन्वय गरी संयुक्त कार्यक्रम सञ्चालन भइरहेको डीएसपी पातलीले बताए ।

“सामाजिक तनाव उत्पन्न गर्ने व्यक्ति वा समूहमाथि कडा कारबाही गरिनेछ,” उनले चेतावनी दिए । प्रदेशमै धार्मिक सद्भाव र सामाजिक एकता बलियो बनाउने सन्देशसहित बाँके प्रहरीले चाडपर्वलाई शान्त, सुव्यवस्थित र सुरक्षापूर्ण बनाउन सम्पूर्ण तयारी पूरा गरेको जनाएको छ ।