२१, असार २०८२

अर्घाखाँची।नेकपा (एमाले) अर्घाखाँची जिल्ला कमिटीका सचिव तेजबहादुर रायमाझी (विधान) की आमा भिमकुमारी रायमाझीको निधनप्रति श्रद्धाञ्जली अर्पण गर्न शनिबार अर्घाखाँचीमा शोकसभा आयोजना गरिएको छ । नेकपा एमाले जिल्ला कमिटी र सन्धिखर्क नगर कमिटीको संयुक्त आयोजनामा सम्पन्न कार्यक्रममा लुम्बिनी प्रदेशका मुख्यमन्त्री तथा एमाले केन्द्रीय सदस्य चेतनारायण आचार्यले दिवंगत भिमकुमारीप्रति श्रद्धाञ्जली अर्पण गर्दै उहाँको योगदानको उच्च प्रशंसा गर्नुभयो ।

मुख्यमन्त्री आचार्यले भिमकुमारी रायमाझीले एक अभिभावककाे नाताले पार्टी निर्माण, संगठन विस्तार र जनसेवामा अतुलनीय योगदान गर्नुभएको स्मरण गर्नु भयाे ।`उहाँले उत्पीडित जनताको सेवामा विभिन्न ढंगले योगदान गर्नुभयो । सिङ्गो अर्घाखाँची जिल्लामा एमालेको आधार बलियो बनाउन उहाँको भूमिका महत्त्वपूर्ण रह्यो´आचार्यले भन्नुभयाे-`उहाँकाे याेगदान अतुलनीय छ । यसको हामी सधैं स्मरण गर्नेछाैं ।´

मुख्यमन्त्री आचार्यले भिमकुमारी रायमाझीलाई असल, इमानदार र समर्पित अभिभावकको रूपमा स्मरण गर्नुभयो । `जन्मसँगै मृत्यु पनि सँगै आउँछ । अल्पायुमा भएको उहाँको निधनले हामी सबै स्तब्ध भएका छौं । हामीले एक सच्चा अभिभावक गुमाएका छौं । पार्टीले एक असल आधार गुमाएको छ,´उहाँले भन्नुभयाे।

६६ वर्षको उमेरमा असार १६ गते उहाँको निधन भएको हो । श्रद्धाञ्जली सभामा नेकपा एमाले केन्द्रीय सल्लाहकार परिषद् सदस्य नरेन्द्र कुमार क्षेत्री, जनार्जन खनाल, जिल्ला अध्यक्ष पिताम्बर भुसाल लगायत नेताहरूको उपस्थिति रहेको थियो । कार्यक्रम मार्फत सहभागीहरूले दिवंगत प्रति श्रद्धाञ्जली अर्पण गर्दै रायमाझी परिवारप्रति गहिरो समवेदना प्रकट गरेका थिए ।