सुर्खेत ।

नेकपा एमालेका अध्यक्ष केपी शर्मा ओलीले कर्णालीको विकासका लागि कृषि उत्पादनमा ध्यान दिनुपर्ने बताएका छन् । पार्टीको कर्णाली प्रदेश अधिवेशनको उद्घाटन सत्रमा बोल्दै उनले प्रविधिको प्रयोग बढाएर कर्णालीलाई उत्पादनमा जोड्नुपर्ने धारणा व्यक्त गरे ।

कर्णालीमा मानव, शिक्षा, पूर्वाधार स्वास्थ्य लगायतका विकास तत्काल आवश्यक रहेको उनले बताए । उनले भने, ‘प्राकृतिक र सांस्कृतिक हिसावले कर्णाली सम्वृद्ध छ । यसको अर्थ यहाँ विकासका सम्भावना छन् । जडिबुटी देखि जलविद्युत आयोजना लगायतका सम्भावना छन् । कृषिमा समेत यस प्रदेशमा आवश्यक पूर्वाधारबाट विकास गरिनुपर्छ ।’

निरन्तर बगिरहेको कर्णाली र भेरीको पानी सदुपयोग गर्नुपर्छ । कर्णालीमा कृषि, मत्स्यपालन पशुपालन लगायतका ध्यान दिनुपर्ने उनले बताए । कृषि उत्पादन तथा औषधिका लागि आवश्यक जडिबुटी उत्पादनमा कर्णालीमा सम्भावना धेरै रहेको उनले बताए ।

कर्णालीमा कृषि उत्पादन वृद्धि गर्न एमालेका कार्यकर्ता अग्रसर हुनुपर्ने उनले बताए । कर्णालीका युवालाई पालिकाबाटै कृषि तालिमका लागि पठाउनुपर्ने उनले बताए । वर्तमान सरकारले कर्णालीमा उत्पादन वृद्धि गर्न तर्फ ध्यान नदिएको उनको आरोप छ ।