कमलराज रेग्मी, निवर्तमान सभापति
नेपाली काँग्रेस, जिल्ला कार्यसमिति, सुर्खेत

हाम्रो सिधा कुरा भनेको नेपाली काँग्रेस जिल्ला कार्य समितिका साथीहरुसँग बसेर, टेबुल वार्ता गरेर काँग्रेसलाई कसरी जिताउने सकिन्छ । उचित सबै साथीहरुलाई सम्मान हुने तरिकाले अघि बढ्नुपर्छ भन्ने हाम्रो माग हो । तर नेतृत्वतहमा रहेका उहाँहरुले (संस्थापन पक्ष) गर्नुभएन । अहिले उहाँहरुले मिडियाबाजी गरेर हामीले बोलाउँदा पनि इत्तर पक्ष आएन भनिरहनुभएको छ ।

म दावाका साथ भन्छु उहाँहरुले अहिलेसम्म हामीलाई टेबुलमा बसेर छलफल गरौं, को उचित छ, कसलाई कहाँ उठाउने ? कसरी चुनाव जिताउने भन्ने बारेमा एक पटक पनि छलफल भएको छैन । अहिलेसम्म एक पटक मात्र छलफल भयो । उहाँहरुले गठबन्धनभित्रको भागवण्डा टुंगिएपछि बसौंला भनेर भन्नुभयो । त्यसपछि फर्कीएर आउनुभएन । हामीलाई बोलाउँदा पनि बोलाइएन ।

अर्को कुरा हाम्रो पक्षलाई उहाँहरुले सुर्खेतका कुनै पनि ठाउँमा उम्मेदवारी दिनुभएन् । माथी केन्द्रमा उपसभापतिको पावर छ भनेर एक पक्षिय तरिकाले जानुभएको छ । हाम्रो भनाई त सबै साथीहरुलाई चुनावमा लागेर काँग्रेसलाई जिताउनुपर्छ भन्ने हो ।

०७४ मा मेरै कमाण्डमा हामीले सुर्खेतमा बलियो शक्ति केन्द्रका रुपमा स्थापित भएका थियौं । तर उहाँहरुले एकलौटी तरिकाले कुनै ठाउँमा कुनै सम्बन्ध नै नराखेर, कुनै तहका साथीहरुसँग (वडादेखि जिल्लातहसम्मै) सहकार्य नै नगरेर उहाँहरुले दर्खास्त हाल्नुभएको छ । त्यो भएर सबै साथीभाईहरुको गुनासो पनि छ । कसरी जान्छ भनेर अब मैले भनेर मात्र हुँदैन् ।

मनोनयन दर्ता गर्ने अन्तिम दिनको बेलुका साढे ४ बजेतिर होला सायद महामन्त्री गगनकुमार थापा जीले पूर्व क्षेत्रीय सभापति नारायण कोइरालालाई फोन गर्नुभएको थियो । वीरेन्द्रनगर कमिटीले टिकटको बारे सिफारिस गर्दाखेरी उपसभापति पूर्णबहादुर खड्का जी को नजिकको मान्छे नगर सभापति उपेन्द्र खड्काले नारायण जीको नाम हाल्नुभएन ।

त्यसपछि प्रदेशमा भएका साथीहरुले थपेर पठाउनुभयो । नारायण जीले मेरो तल्लो निकायबाट सिफारिस नभएको हुनाले म उम्मेदवार लड्दैन भनेर एक दिन अगाडि नै विज्ञप्ति निकालेर उम्मेदवारी फिर्ता लिइसक्नुभएको थियो ।

अब साढे चार बजे गगन जीले फोन गर्दा खड्का जीहरु उम्मेदवारी दर्ता गर्न गइसक्नुभएको थियो । यो कपोकल्पित कुरा हो । हामीसँग सरसल्लाह गरेर जिल्लाभर कुनैपनि ठाउँमा उम्मेदवार दिनुभएन । म निवर्तमान जिल्ला सभापति हो । मेरै वडामा पनि कसलाई उम्मेदवार बनाउने भनेर सोध्नुभएन भनेपनि उहाँहरुको कहाँसम्मको घमण्डिपना हो ।

अन्तिममा आएर मेरो भाइलाई टिकट दिएर वडामा लडाउनु है ? नत्र समस्या हुन्छ त्यहाँ भनेर भन्नुभएको थियो रे ! मेरो भाइको इन्टेनसनै थिएन । मेरो भाइले उम्मेदवार हालेन । त्यसो किन भन्दा आफ्नो भाईलाई टिकट दियो भन्नलाई हो । अबको प्रष्ट धारणा काँग्रेसलाई जिताउनुपर्छ, काँग्रेसभित्रको लिडरसिप करेक्सन हुनुपर्छ भन्ने हो । यो उपसभापतिको जिल्ला हो ।

उहाँका मान्छेहरुलाई उहाँले एकलौटी राख्नुभएको छ । जिल्ला कार्यसमितिमा हाम्रो कुनै सहभागिता गराइएको छैन । यसको परिणाम उहाँहरुले नै लिने हो र भोलीको जवाफदेही पनि उहाँहरु नै हो । राम्रो–नराम्रो दुबैको पगरी बाँध्ने उहाँहरुले नै हो । हाम्रो चुनाव बिथोल्ने रणनीति होइन् । (उहाँसंग हाम्रा सहकर्मीले गरेको कुराकानीमा आधारित भनाई)