बलिउड अभिनेता परेश रावलले आफ्नो अभिनयले धेरैको मन जित्न सफल भएका छन् । आफ्नो बहुप्रतिभाशाली अभिनय क्षमता, ठट्यौली पारा र भिन्न पर्सनालिटीका कारण परेश रावल मानिसहरुको मन मुटुमा बस्न सफल भएका छन् ।

कुनै फिल्ममा परेश रावल छन्, चाहे त्यो फिल्म चलोस् नचलोस्, उनले मनोरञ्जन भने दिने गर्छन् । साढे २ दशकदेखि परेश रावल अभिनयको दुनियाँमा सक्रिय छन् । अभिनेताको जन्मदिनमा उनको नीजि र व्यावसायिक जीवनसँग सम्बन्धित रोचक जानकारी साझा गरौं ।

परेश रावलको जन्म ३० मे, सन् १९५५ मा मुम्बईमा भएको थियो । अभिनेताले मुम्बईबाट नै कमर्समा ग्रेजुएशन गरे र थिएटरसँग जोडिए । उनले सन् १९७९ की मिस इन्डिया स्वरुप सम्पतसँग विवाह गरे । परेश रावलको स्वरुपसँग पहिलो भेट सन् १९७५ मा एक कार्यक्रमका बेला भएको थियो । स्वरुपलाई देख्ने बित्तिकै परेश रावल उनीप्रति आकर्षित भए ।

उनले त्यति नै बेला उनीसँग विवाह गर्ने निश्चय गरिसकेका थिए । तर यो त्यति सहज थिएन । यसका लागि परेशले निकै मिहिनेत गर्नुपर्यो । त्यसपछि सन् १९८७ मा १२ वर्ष सँगै बसेपछि परेशले स्वरुपसँग विवाह गरे । यी दुईका दुई सन्तान छन् ।