नयाँ सडक निर्माणका क्रममा थुप्रिएको माटो हटाउन जाँदै गरेको स्काभेटर करिब २ सय मिटर तल भीरमा खस्दा उक्त घटना भएको हो। दुर्घटनामा परेका एक्स्काभेटर चालकसहित तीन जना सवार थिए। तीमध्ये चालक र सहचालक सकुशल रहेका छन् भने कालिकोट नरहरीनाथ गाउँपालिका–२ का अन्दाजी १८ वर्षीय महेश रावल बेपत्ता भएको प्रहरी कार्यालय बाजुराले जनाएको छ।

प्रहरीका अनुसार प्रदेश ३–०१–००३ क ६३११ नम्बरको स्काभेटर चालक अन्दाजी २५ वर्षीय केशब बिष्टले चलाएका थिए। नयाँ निर्माण भइरहेको लौखु जिरो पोइन्ट–कोल्टी सडकबाट खसेको माटो कर्णाली करिडोरमा थुप्रिएर सडक अवरुद्ध भएको थियो। सोही माटो पन्छाउन जाने क्रममा स्काभेटर दुर्घटनामा परेको हो।

बेपत्ता रावलको खोजीका लागि नेपाल प्रहरी र नेपाली सेना घटनास्थलमा पुगे पनि भीर अत्यन्तै कठिन र जोखिमपूर्ण भएकाले उद्धार कार्यमा समस्या भइरहेको जिल्ला प्रहरी कार्यालय बाजुराका प्रमुख प्रहरी नायब उपरीक्षक इकवाल हवारीले बताउनुभयो।