बुटवल झडपमा घाइते चार प्रहरीलाई काठमाडौं लगीयो, एपिएफ अस्पतालमा उपचार हुँदै
काठमाडौं । रुपन्देहीको मोतीपुरमा आइतबार भएको झडपमा परी घाइते भएका चार जना सुरक्षाकर्मीलाई उपचारका लागि काठमाडौं लगीएको छ ।
नेपाल प्रहरी र सशस्त्र प्रहरीका चार जवानलाई थप उपचारका लागि आज हेलिकप्टरबाठ काठमाडौं लगीएको हो ।
झडपमा परी गम्भीर घाइते भएका नेपाल प्रहरीका दुई र सशस्त्र प्रहरीका दुई जना गरी चार जना थप उपचारका लागि काठमाडौं पठाइएको जिल्ला प्रहरी कार्यालय रुपन्देहीका प्रहरी प्रमुख प्रहरी उपरीक्षक मनोज केसीले जानकारी दिए ।
केसीका अनुसार इलाका प्रहरी कार्यालय बुटवलमा कार्यरत २८ वर्षीय प्रहरी जवान जयप्रकाश थारू र दंगा प्रहरी नियन्त्रण सुनवलमा कार्यरत प्रहरी जवान यज्ञराज पुन मगर तथा सशस्त्र प्रहरी बल नेपाल नम्बर २८ गण कपिलवस्तुमा कार्यरत ३६ वर्षीय हवल्दार तिलकबहादुर धामी र ३६ वर्षका जवान खुसीराम चौधरीलाई काठमाडौं लगीएको हो ।
नेपाल प्रहरी र सशस्त्र प्रहरी गरी ५६ जना सुरक्षाकर्मी घाइते भएको प्रहरीले जनाएको छ । नेपाल प्रहरीका ३३ जना घाइते भएका छन् । घाइते भएका अन्य प्रहरी भने उपचारपछि डिस्चार्ज भएको प्रहरी प्रमुख केसीले बताए । काठमाडौं रिफर गरिएका चार जनाको सशस्त्र प्रहरी अस्पताल बलम्बुमा उपचार हुने छ ।
सुकुम्बासीका नाममा समूह बनाएर घरटहरा बनाएकाहरूसँगको दोहोरो झडपमा परी सशस्त्र, जनपद प्रहरी र सर्वसाधारणसहित ७४ जना घाइते भएका हुन् ।
प्रहरीको गोली लागि चार सर्वसाधारणको ज्यान गएको छ । झडपमा परी घाइते भएकाको लुम्बिनी प्रादेशिक अस्पताल बुटवल र भैरहवा मेडिकल कलेज भैरहवामा उपचार भइरहेको छ ।
आइतबार मोतीपुर औद्योगिक क्षेत्रको जग्गामा सुकुम्बासी नाममा समूह बनाएर घरटहरा बनाएकाहरुसँग सुरक्षाकर्मीसँग झडप भएको हो । प्रशासनले त्यो क्षेत्रमा हिजोदेखि लगाएको कर्फ्यु जारी छ ।
