बाँके ,६ माघ।

नेकपा (एमाले) का पार्टीभित्र प्रभावशाली मानिने नेताहरूले लुम्बिनी प्रदेशका विभिन्न निर्वाचन क्षेत्रबाट प्रतिनिधिसभा सदस्य पदका लागि उम्मेदवारी दर्ता गराएका छन् । पार्टीले अनुभवी, संगठनमा पकड भएका तथा जनमत प्रभाव पार्न सक्ने नेताहरूलाई प्रमुख निर्वाचन क्षेत्रमा अघि सार्दै प्रदेशभर बलियो चुनावी उपस्थिति जनाउने रणनीति लिएको देखिन्छ ।
एमाले उपाध्यक्ष विष्णुप्रसाद पौडेलले रुपन्देही–२ बाट उम्मेदवारी दर्ता गराउनुभएको छ भने अर्का उपाध्यक्ष गोकर्ण बिष्टले गुल्मी–२ बाट उम्मेदवारी दिनुभएको छ । महासचिव शंकर पोखरेल दाङ–२ बाट र पूर्व उपमहासचिव तथा प्रभावशाली नेता प्रदीप ज्ञवाली गुल्मी–१ बाट प्रतिनिधिसभा सदस्य पदका लागि उम्मेदवार बनेका छन् ।

यससँगै पार्टीले संगठनात्मक सन्तुलन र क्षेत्रीय प्रतिनिधित्वलाई ध्यानमा राख्दै अन्य निर्वाचन क्षेत्रमा पनि उम्मेदवार अघि सारेको छ । दाङ–१ बाट रेवतीरमन शर्मा र दाङ–३ बाट घनश्याम पाण्डेयले उम्मेदवारी दर्ता गराएका छन् । बाँकेका तीनै निर्वाचन क्षेत्रमध्ये बाँके–१ बाट सूर्य ढकाल, बाँके–२ बाट मोहम्मद इश्तियाक राई र बाँके–३ बाट सुमन मल्ल उम्मेदवार बनेका छन् ।
बर्दियामा क्षेत्र नम्बर १ बाट शालिकराम अधिकारी र क्षेत्र नम्बर २ बाट विमला बिकले मनोनयन दर्ता गराएका छन् । रोल्पा–१ बाट गोकुल घर्ती, रुकुम पूर्व–१ बाट लिलामणि गौतम, प्यूठान–१ बाट सूर्यबहादुर थापा र अर्घाखाँची–१ बाट पिताम्बर भुसालले प्रतिनिधिसभा सदस्य पदका लागि उम्मेदवारी दिएका छन् ।
पाल्पा जिल्लामा क्षेत्र नम्बर १ बाट नारायण आचार्य र क्षेत्र नम्बर २ बाट ठाकुर गैरे उम्मेदवार बनेका छन् । नवलपरासी पश्चिम–१ बाट रामप्रसाद पाण्डे र सोही क्षेत्रबाट लेखनाथ खरेलले पनि उम्मेदवारी दर्ता गराएका छन् । रुपन्देहीका अन्य निर्वाचन क्षेत्रतर्फ रुपन्देही–१ बाट दधिराम न्यौपाने, रुपन्देही–३ बाट बाशु घिमिरे, रुपन्देही–४ बाट प्रमोद यादव र रुपन्देही–५ बाट खिमलाल भट्टराई उम्मेदवार बनेका छन् ।
कपिलवस्तु जिल्लामा क्षेत्र नम्बर १ बाट बिश्राम चौधरी, क्षेत्र नम्बर २ बाट दृघनारायण पाण्डे र क्षेत्र नम्बर ३ बाट बिरेन्द्र कनौडियाले उम्मेदवारी दर्ता गराएका छन् ।
प्रमुख निर्वाचन क्षेत्रमा पार्टी नेतृत्वका अनुभवी र प्रभावशाली नेताहरूलाई अघि सार्दै एमालेले लुम्बिनी प्रदेशमा सशक्त चुनावी उपस्थिति जनाउने संकेत दिएको राजनीतिक विश्लेषकहरूको भनाइ छ ।