काली बहादुर परियार
जुम्ला ,१७ पुस।

पातारासी गाउँपालिका–२ मा रेबिजको आशंका गरिएको बाैलाह कुकुरको टोकाइ बाट दुई जना गम्भीर घाइते भएका छन् । गाउँपालिका–२ अन्तर्गत पर्ने पेरे गाउँमा भएको यस घटनाले स्थानीय बासीमा त्रास फैलिएको छ भने बालबालिका, ज्येष्ठ नागरिक र अभिभावकहरू थप सतर्क बन्नुपर्ने अवस्था आएको छ ।

स्थानीयका अनुसार अचानक आक्रमणकारी बनेको बाैलाह कुकुरले एक पछि अर्को गरी मानिसलाई टोक्न थालेपछि गाउँमा त्रास मच्चिएको छ । कुकुरको टोकाइबाट पातारासी गाउँपालिका–२ का ५२ वर्षीय बिर सार्की र २२ वर्षीय काले बुढा गम्भीर घाइते भएका हुन् ।

दुवै जनालाई शरीरका विभिन्न भागमा गहिरो चोट लागेको जिल्ला प्रहरी कार्यालय जुम्लाका प्रहरी नायब उपरीक्षक ( डिएसपी ) रबिन बाबू रेग्मीले जानकारी दिए ।

घटनापछि घाइतेहरूलाई तत्काल उपचारका लागि नजिकको स्वास्थ्य संस्थामा लगिएको छ । स्वास्थ्यकर्मीका अनुसार रेबिज एक प्राणघातक रोग भएकाले कुकुरको टोकाइलाई सामान्य रूपमा लिन नहुने र समयमै एन्टी–रेबिज खोप लगाउनु अत्यन्त आवश्यक बताएका छन् ।

ढिलाइ भए ज्यान समेत जान सक्ने जोखिम रहने स्वास्थ्यकर्मीको चेतावनी रहेकाे छ । घटना सँगै पातारासी गाउँपालिका र स्वास्थ्य निकायले स्थानीयहरू लाई विशेष सतर्कता अपनाउन अनुरोध गरेका छन् ।

विशेष गरी बालबालिकालाई एक्लै बाहिर नछोड्न, शंकास्पद कुकुर देखिएमा नजिक नजान र तुरुन्तै स्थानीय जनप्रतिनिधि वा सम्बन्धित निकायलाई जानकारी गराउन आग्रह गरिएको छ ।

स्थानीयबासीले भने गाउँमा छाडा कुकुरको संख्या बढ्दै गएको र समयमै नियन्त्रण नगर्दा यस्ता घटना दोहोरिने जोखिम रहेको गुनासो गरेका छन् । उनीहरूले पालिकाले छाडा तथा रेबिज संक्रमित कुकुर नियन्त्रण, खोप अभियान र जनचेतनामूलक कार्यक्रम तत्काल सञ्चालन गर्न माग गरेका छन् ।