बाँके ,२५ बैशाख ।

नेपालगञ्ज उपमहानगरपालिकाले आवासीय बीमा कार्यक्रम अन्तर्गत एक पीडित परिवारलाई राहत स्वरूप २ लाख ३२ हजार ९ सय रुपैयाँ हस्तान्तरण गरेको छ।

गत वर्षदेखि नेपालमै पहिलो पटक लागू गरिएको यस कार्यक्रम अन्तर्गत उपमहानगरपालिकाले विपद् जोखिम क्षेत्रका रूपमा पहिचान गरिएका वडा नम्बर ३ र ७ का १८४ घरपरिवारको बीमा गरिदिएको थियो। 

उपमहानगरपालिकाका विपद् फोकल पर्सन दिपेन्द्र श्रेष्ठका अनुसार वडा नम्बर ७ निवासी उत्तम सिंह पन्जाबीको घर वर्षाका कारण भत्किएपछि बीमा दाबी गरिएको हो।उक्त बीमा रकम राष्ट्रिय बीमा कम्पनीमार्फत उपलब्ध गराइएको हो, जसलाई एक औपचारिक कार्यक्रममार्फत पीडित परिवारलाई हस्तान्तरण गरिएको छ।

उपमहानगरपालिकाले १५ लाख रुपैयाँसम्मको बीमा कभर उपलब्ध गराउँदै प्रति परिवार ८ सय ५० रुपैयाँ प्रिमियम शुल्क आफैं तिर्दै आएको छ। पीडित परिवारलाई चेक हस्तान्तरण गर्दै मेयर प्रशान्त बिष्टले यसले न्यून आय भएका परिवारलाई विपद्का बेला आर्थिक सुरक्षा प्रदान गर्ने विश्वास व्यक्त गर्नुभयो । 

उहाँका अनुसार यो कार्यक्रम अब उपमहानगरपालिकाका सबै २३ वटै वडामा विस्तार गर्ने योजना रहेको छ। स्थानीय सरकारको पहलमा प्राप्त बीमा रकमले आफूहरूलाई केही राहत महसुस भएको पीडित परिवारका सदस्य लिला आचार्यले बताउनुभयो । 

सुपर परियोजनाको प्राविधिक सहयोगमा सञ्चालन गरिएको यो कार्यक्रमले विपद् व्यवस्थापनमा स्थानीय तहको सक्रियता र नवीन अभ्यासलाई थप मजबुत बनाएको छ।