सुर्खेत, १३ बैशाख ।
डोल्पाका तीन वटा स्थानीय तहका उम्मेदवार सर्वसम्मत रुपमा निर्वाचित भएका छन् । शे–फोक्सुण्डो गाउँपालिका, काइके गाउँपालिका र छार्काताङसोङ गाउँपालिकाका अध्यक्ष र उपाध्यक्षका उम्मेदवार सर्वसम्मत निर्वाचित भएका हुन् ।

डोल्पा जिल्लाको शे–फोक्सुन्डो गाउँपालिकामा नेकपा एमालेबाट अध्यक्ष पदका उम्मेदवार धावासम्डुक लामा सर्वसम्मत विजयी भएका छन् । अध्यक्षमा लामासहित गाउँपालिकामा प्यानलनै निर्विरोध निर्वाचित भएका हुन् । उपाध्यक्षमा छार्काताङ्सोङ लामा सर्वसम्मत निर्वाचित भएका छन् ।

त्यसैगरी नेकपा एकीकृत समाजवादीले डोल्पा जिल्लामा विजयी शुरुवात गरेको छ । जिल्लाको काइके गाउँपालिका अध्यक्षमा अंगद राना, छार्काताङ्सोङ गाउँपालिकामा सोनाम गुरुङ, डोल्पो बुद्ध गाउँपालिका उपाध्यक्ष पेमा दोर्जे गुरुङ निर्विरोध निर्वाचित भएको नेकपा एकीकृत समाजवादी डोल्पाका अध्यक्ष नन्दसिंह बुढाले जानकारी दिए ।

नेकपा (एकीकृत समाजवादी) का २ गाउँपालिका अध्यक्ष, १ गाउँपालिका उपाध्यक्ष, ६ वडाका ६ अध्यक्ष र २४ सदस्य गरी ९ जना पदाधिकारीसहित ३३ जना जन प्रतिनिधिहरु निर्विरोध निर्वाचित भएका छन् ।

जिल्ला निर्वाचन अधिकारी राम बहादुर सार्कीका अनुसार काइके गाउँपालिकाको उपाध्यक्षमा काँग्रेसका निमा बुढाका साथै सबै वडा अध्यक्षहरूसहित ३५ जना निर्विरोध निर्वाचित भएका हुन् ।

पालिका अध्यक्ष, उपाध्यक्ष र वडा अध्यक्षहरुमा अन्य कुनै पार्टीको उम्मेदवारी नपरेपछि निर्विरोध निर्वाचित भएका हुन् । त्यस्तै डोल्पोबुद्ध गाउँपालिका उपाध्यक्षमा पेमा वाङ्जु गुरुङ निर्वाचित भएको समाजवादीका जिल्ला अध्यक्ष बुढाले बताए ।

एमाले कर्णाली प्रदेश समन्वय कमिटीका अनुसार शे–फोक्सुण्डो गाउँपालिकाको १ नम्बर वडाध्यक्षमा जिक्मेछोइङ लामा, ३ नम्बर वडाध्यक्षमा पेमागिर्मे गुरुङ, ५ नम्बर वडाध्यक्षमा कार्मातार्के गुरुङ, ६ नम्बर वडाध्यक्षमा रिग्जिन गुरुङ, ७ नम्बर वडाध्यक्षमा पेमाछिरिङ गुरुङ र ९ नम्बर वडाध्यक्षमा सार्के लामा निर्विरोध निर्वाचित भएका छन् ।

त्यस्तै, अन्य सदस्यहरु निर्विरोध निर्वाचित भएका छन् । एमाले प्रदेश अध्यक्ष विनोदकुमार शाहले उक्त ठाउँमा अन्य कुनै पनि राजनीतिक दल नभएकोले उनीहरू सर्वसम्मत नै निर्वाचित भएको जानकारी दिए । शाहले उनीहरु बाहेक अन्य कसैको पनि उम्मेदवारी नपरेपछि निर्वाचन कार्यालयले सर्वसम्मत निर्वाचित भएको घोषणा गर्न भने केही प्रकृया बाँकी रहेकाे जनाइएकाे छ ।