नेपालगन्जस्थित सञ्जीवनी कलेज अफ मेडिकल साइन्सेस (सञ्जीवनी अस्पताल) मा आजदेखि ‘आमा सुरक्षा कार्यक्रम’ औपचारिक रूपमा सुरु गरिएको छ । कार्यक्रमको उद्घाटन नेपालगन्ज उपमहानगरपालिकाका नगर प्रमुख प्रशान्त विष्टले गरेका हुन ।

मातृ तथा शिशु स्वास्थ्य सुधार गर्ने लक्ष्यसहित सुरु गरिएको यो कार्यक्रमले बाँके जिल्लामा स्वास्थ्य सेवाको पहुँच विस्तार गर्न महत्वपूर्ण भूमिका खेल्ने अपेक्षा गरिएको छ । उद्घाटन समारोहलाई सम्बोधन गर्दै नगर प्रमुख विष्टले ‘आमा सुरक्षा कार्यक्रम’ सञ्चालनमा आएपछि बाँकेमा उच्च रहेको मातृ तथा शिशु मृत्युदर घटाउन सहयोग पुग्ने विश्वास व्यक्त गरे ।

उनले लुम्बिनी प्रदेशमै बाँके मातृ मृत्युदरका हिसाबले संवेदनशील जिल्लामध्ये एक भएकाले यस्ता कार्यक्रमले सकारात्मक परिवर्तन ल्याउने बताए । “स्वास्थ्य सेवा सबै नागरिकको आधारभूत अधिकार हो, त्यसैले स्थानीय सरकारले यसलाई उच्च प्राथमिकतामा राखेको छ,” उनले भने ।

अस्पतालका प्रबन्ध निर्देशक (एमडी) सन्तोष कुमार खनालका अनुसार कार्यक्रम अन्तर्गत गर्भवती महिलाहरूलाई नियमित स्वास्थ्य जाँच, सुरक्षित सुत्केरी सेवा, आवश्यक परामर्श तथा उपचार सेवा सहज र सुलभ रूपमा उपलब्ध गराइनेछ । उनले विशेष गरी आर्थिक रूपमा कमजोर, दुर्गम क्षेत्रका तथा स्वास्थ्य सेवाको पहुँचबाट वञ्चित महिलाहरूलाई यस कार्यक्रमले प्रत्यक्ष लाभ पुर्‍याउने बताए ।

त्यस्तै, अस्पतालका मेडिकल सुपरिटेन्डेन्ट डा. रोमन किदवाईले ‘आमा सुरक्षा कार्यक्रम’ले गर्भावस्थादेखि सुत्केरीपछिको अवस्थासम्म आवश्यक सम्पूर्ण स्वास्थ्य सेवा एकै स्थानबाट उपलब्ध गराउने जानकारी दिए । उनका अनुसार जोखिमयुक्त गर्भावस्थाको समयमै पहिचान, आवश्यक उपचार र सुरक्षित प्रसूति सुनिश्चित गर्न यो कार्यक्रम प्रभावकारी माध्यम बन्नेछ । “समयमै जाँच र उपचार पाएमा धेरै मातृ तथा शिशु मृत्यु रोक्न सकिन्छ,” उनले जोड दिए ।

यसअघि निजी अस्पतालहरूमा ‘आमा सुरक्षा कार्यक्रम’ सञ्चालन नहुँदा सरकारी भेरी अस्पतालमा अत्यधिक चाप परेको थियो। अधिकांश सेवाग्राही त्यहीँ केन्द्रित हुँदा सेवा व्यवस्थापनमा चुनौती देखिएको थियो । अब सञ्जीवनी अस्पतालमा पनि कार्यक्रम सुरु भएसँगै स्वास्थ्य सेवाको भार केही हदसम्म बाँडिने र सेवाग्राहीले सहज रूपमा सेवा पाउने अपेक्षा गरिएको छ ।

संघीय सरकारले केही समयअघि अनुदान रोकेपछि ‘आमा सुरक्षा कार्यक्रम’ प्रभावित बनेको थियो । तर भेरी अस्पतालमा बिरामीको अत्यधिक चाप बढेपछि पुनः सेवा विस्तार गर्ने आवश्यकता महसुस गर्दै नेपालगन्ज उपमहानगरपालिकामार्फत सञ्जीवनी अस्पताललाई अनुदान उपलब्ध गराइएको हो । यसले निजी क्षेत्रसँग सहकार्य गरी सार्वजनिक स्वास्थ्य सेवा विस्तार गर्ने नीतिलाई पनि मजबुत बनाएको छ ।

कार्यक्रम उद्घाटन समारोहमा नेपालगन्ज उपमहानगरपालिकाका प्रमुख प्रशासकीय अधिकृत मान बहादुर बम, स्वास्थ्य महाशाखा प्रमुख राम बहादुर चन्द, नेपाल पत्रकार महासङ्घ बाँकेका अध्यक्ष नवीन गिरी, अस्पतालका चिकित्सक तथा कर्मचारी लगायतको उपस्थिति रहेको अस्पतालका प्रबन्धक कुमार अधिकारीले जानकारी दिए ।

स्थानीय तह, निजी क्षेत्र र स्वास्थ्य संस्थाबीचको सहकार्यमा सुरु गरिएको ‘आमा सुरक्षा कार्यक्रम’ले आगामी दिनमा मातृ तथा शिशु स्वास्थ्य क्षेत्रमा देखिएका चुनौतीहरू समाधान गर्दै सुरक्षित मातृत्व सुनिश्चित गर्न महत्वपूर्ण योगदान पुर्‍याउने अपेक्षा गरिएको छ ।