शिवालयको वडा कार्यालयसँगै बग्यो खेतबारी
सुर्खेत, ३ भदौं ।
मंगलबार राति अविरल वर्षासँगै आएको बाढीले जाजरकोटमा वडा कार्यालय बगाएको छ । जिल्लाको शिवालय गाउँपालिका वडा नम्बर ६ को वडा कार्यालयको आधा भाग बाढीले बगाइदिएको छ । जाँत खोलामा आएको बाढीले कटान गर्दा टुनीबगरमा रहेको ६ नम्बर वडा कार्यालयको भवन बगाएको शिवालय गाउँपालिकाका अध्यक्ष नरेन्द्र शाहीले जानकारी दिए ।
उनका अनुसार कार्यालय नजिकै रहेको जाँत खोलाको ट्रस ब्रिज पनि बगाएको छ । क्षतिबारे यकिन तथ्यांक नआएको अध्यक्ष शाहीले बताए। ‘राति आएको बाढीले वडा कार्यालय, पुल र खेतीयोग्य जमिन बगाएको मोटामोटी खबर आएको छ, टेलिफोनले काम नगर्दा यकिन जानकारी आएको छैन,’ उनले भने । वडा नम्बर ६ का अध्यक्ष भक्त बहादुर थापाका अनुसार दर्जनौं पशुचौपाया बाढीले बगाएको छ ।
उनका अनुसार वडा नम्बर ६ भित्रै पर्ने लोतपाखा, ठकुरी जाँत, रोकाय जाँत, रिसिना, धिरपना, टोटापोखरा, पाल्त गाउँका डेढ सयभन्दा धेरै घरहरू जोखिममा छन् । २८ वटा घर तत्कालै सार्नुपर्ने स्थिति रहेको अध्यक्ष थापाले बताए । ‘केही घर त चर्किएका पनि छन्, तत्कालका लागि २८ वटा घर सार्नैपर्ने अवस्था छ,’ वडा अध्यक्ष थापाले भने, ‘सयौं बिगाहा खेत बगरमा परिणत भएको छ, दर्जनौं घट्ट समेत बगेका छन् ।’
