काली बहादुर परियार

जुम्ला,१४ कार्तिक।

जलवायु परिवर्तनका कारण उत्पन्न आप्रवासनका चुनौतीलाई सम्बोधन गर्न जुम्लाकाे तिला गाउँपालिकामा जलवायु प्रेरित आप्रवासनमा रहेका समुदायहरूमा उत्थानशीलता र सशक्तिकरण वृद्धि परियोजना अन्तर्गत युवा कचहरी कार्यक्रम सम्पन्न भएको छ।

कचहरीमा युवाले जलवायु परिवर्तनका असर, स्थानीय उत्पादन र रोजगारीका अवसरहरूमा केन्द्रित भएर छलफल गरेका थिए । कार्यक्रममा स्थानीय प्रशासन, कृषि, उद्योग र अनुसन्धान क्षेत्रका विज्ञहरूले युवा दृष्टिकोणमा जोड दिंदै व्यवहारिक समाधानका सुझाव प्रस्तुत गरे ।

कार्यक्रमका मुख्य प्यानलिष्टहरूमा प्रमुख उद्योग तथा उपभोक्ता हित संरक्षण कार्यालयका मन्दिरनाथ योगी, तिला गाउँपालिकाका कृषि शाखा प्रमुख राजेश विश्वकर्मा, कृषि विकास कार्यालयका प्रमुख रामभक्त अधिकारी, र बागवानी अनुसन्धान अधिकृत टीका कुमारी थापा मगर रहेका थिए ।

वक्ताहरूले जलवायु परिवर्तनका कारण खेतीपातीमा आएको अस्थिरता, उत्पादन घट्दै गएको अवस्था र रोजगारीका सीमित अवसरका कारण युवाहरू गाउँ छोड्न बाध्य हुने अवस्था माथि चिन्ता व्यक्त गरेका छन् ।

उद्योग तथा उपभोक्ता हित संरक्षण कार्यालय जुम्लाका प्रमुख मन्दिरनाथ योगीले भने, हाम्रो युवाशक्ति गाउँमै रोजगारी र उद्यमशीलता सिर्जना गर्न सक्षम छ, तर नीति र स्रोत सही रूपमा परिचालन गर्नु पर्ने बताए ।

त्यस्तै तिला गाउँपालिका कृषि शाखा प्रमुख राजेश विश्वकर्माले जलवायु अनुकूल कृषि प्रणाली अपनाउन र आधुनिक प्रविधिको प्रयोगमा युवालाई आकर्षित गर्नुपर्नेमा जोड दिए ।

उनका अनुसार, मौसमी अनिश्चितताले उत्पादकत्व घटाइरहेको छ, त्यसैले अब स्मार्ट कृषि र स्थानीय बीउ संरक्षणमा युवाको नेतृत्व जरुरी रहेकाे बताए ।

यस्तै कृषि विकास कार्यालय जुम्लाका प्रमुख रामभक्त अधिकारीले जलवायु प्रतिरोधी बाली र स्थानीय उत्पादनमा आधारित बजार सञ्जाल विस्तार गर्नुपर्ने सुझाव दिए ।

बागवानी अनुसन्धान केन्द्र राजिकाेटका अधिकृत टीका कुमारी थापा मगरका अनुसार, महिला र युवतीहरूको सहभागिता बिना सशक्तिकरण अधुरो हुने बताइन् । उनले भनिन् , जलवायु अनुकूल कृषि प्रविधि सिक्न युवतीहरू पनि अगाडि आउनुपर्छ।

कार्यक्रमले सहभागी युवाबीच आत्मविश्वास, नेतृत्व क्षमता र समाधानमुखी सोच विकास गर्ने अवसर प्रदान गरेको आयोजक संस्थाले जनाएको छ। स्थानीय युवाहरूले पनि जलवायु परिवर्तनको असर घटाउन गाउँमै हरित उद्यम र रोजगारीका अवसर सिर्जना गर्नुपर्ने आवाज बुलन्द गरे।

युवा र सरकारी निकायबीच सहकार्य गर्दै जलवायु सशक्तिकरण र रोजगारी सिर्जनामा ठोस कार्यक्रम अघि बढाउने प्रतिबद्धता व्यक्त गरिएको थियो ।